Oceans anuncia unha ampliación para chamadas internacionais na tarifa plana de Nexus
xoves, 3 de outubro do 2013
A empresa galega Oceans
anunciou unha serie de novidades acerca dos seus produtos Nexus. Máis
polo miúdo, do que se trata é
dunha mellora e dunha ampliación da tarifa plana deste catálogo de
servizos, engadíndose aos mil minutos de chamadas a teléfonos
fixos nacionais a posibilidade de chamar a fixos dunha ducia de
países diferentes. E todo ao mesmo prezo, sinala Oceans. Trátase,
máis en detalle, da tarifa O meu mundo, que complementa a
tarifa plana xa existente e que, polo tanto, non é outra tarifa
adicional nin un servizo extra polo que sexa preciso contratar.
“Simplemente é unha mellora que se aplica á tarifa plana Nexus
dende xa”, sinala Oceans.
A partir de agora, engade a empresa, os clientes
poderán decidir se consumen o que lles pon Nexus á súa disposición
chamando só a fixos nacionais, se gastan os mil minutos en chamadas
a un ou varios dos países incluídos en O meu mundo, ou se o
que máis lles convén é combinar destinos. “O que é seguro”,
explícase, “é que en virtude disto os usuarios dos nosos produtos
serán máis libres nas súas comunicacións”. Como dixemos, o
servizo non é unha funcionalidade que haxa que contratar aparte,
senón que vén complementar as tarifas planas existentes de todos
os produtos Nexus. Os doce países que integran a tarifa O meu
mundo son Alemaña, Canadá, Chipre, Francia, Estados Unidos,
Hungría, Irlanda, Italia, Portugal, Reino Unido, Suecia e Suíza.
Porén, explica Oceans, esta non é unha listaxe pechada e podería
ir ampliándose progresivamente.