Obama estréase en Tumblr
martes, 25 de outubro do 2011
Estamos afeitos a que os políticos fagan uso das plataformas
de redes sociais como canle de promoción e comunicación, frecuentando
principalmente Facebook e Twitter, así como blogs de seu e canles de YouTube,
pero nos EE.UU. o presidente Barack H. Obama vén de sorprender estreando
presenza en Tumblr, nun espazo que non pretende ser a voz do candidato ás
eleccións norteamericanas de 2012, senón que busca servir de ferramenta para a
súa campaña electoral como un “grande
esforzo de narración colaborativa” por parte da xente que apoia a Obama.
O novo espazo na web servirá para compartir comentarios, publicar gráficas,
compartir fotografías de camisetas e posters que se vaian publicando sobre a
campaña do ano que vén e mesmo facer bromas, pois en boa medida buscan conectar
coa mocidade, xa que son conscientes da importancia que ten na reelección do
candidato demócrata, pois estiman que en 2008 contou co apoio do 66% dos
menores de 30 anos, de aí que non queiran deixar de lado ao seu principal
combustible.