O viveiro da Zona Franca en Molle suma nove iniciativas innovadoras máis
martes, 17 de xuño do 2014
Esta semana comezaron
a súa andaina oito novas empresas nas instalacións do viveiro de
Porto do Molle (Nigrán), ás que cómpre engadir outra
iniciativa máis que asinou o aluguer dun espazo de oficinas no
Centro de Negocios do Consorcio da Zona Franca do dito parque
empresarial da contorna viguesa. En total, o Centro de Negocios
acubilla a día hoxe un total de 44 empresas, con outras 7 en fase de
proxecto ou obras. Segundo fai saber a Zona Franca, a interacción
amosada por estas firmas está a xerar un importante potencial
competitivo, innovador e produtivo, cousa que se vai ver incrementada
coa habilitación dun espazo de co-working no que levar aínda
máis lonxe esta colaboración competitiva.
Volvendo ás oito novas
empresas que se instalarán no devandito viveiro (emprazado na
segunda e a terceira planta do Centro de Negocios), abranguen
múltiples sectores de actividade, como por exemplo a
comercialización de equipos tecnolóxicos de enerxías alternativas,
a arquitectura técnica, os servizos e produtos para a industria
náutica, a xestión de anuncios e publicidade en liña ou o deseño
e fabricación de lámpadas de cartón. Tres delas proveñen da
aceleradora ViaVigo e, coa firma asinada para incorporase ao viveiro,
“dan xa o paso á súa instalación nun espazo que lles viu nacer e
colaborou coa maduración do seu proxecto empresarial”, explica a
Zona Franca.
Por certo que no acubillo
de empresas do Centro de Negocios xa se incuban actualmente 15 novas
iniciativas ás que se lles fornece (entre outras cousas) dun espazo
axeitado para o comezo da súa andaina e formación e asesoramento
para que os negocios prosperen.