O vehículo intelixente creado por Vodafone para Smartiago inicia o trazado do centro histórico compostelán
mércores, 30 de novembro do 2022
Smartiago,
o proxecto de Cidade Intelixente do Concello compostelán, deu estes
días un paso moi relevante na súa vertente máis centrada no
transporte e na mobilidade smart, da man do Goberno local e da
empresa Vodafone. En concreto, o vehículo autónomo, modular e
intelixente deseñado pola operadora de telecomunicacións iniciou
este martes 29 de novembro o trazado do centro histórico de
Santiago.
Fíxoo
tras finalizar as súas actividades en aberto hai dúas semanas e
empregando un dos vehículos deseñados para Smartiago. O automóbil
percorreu a praza de Praterías e rúas contiguas, de 05:00 a 07:00
horas, e a praza da Quintana de 07:00 a 10:30 horas. Estes horarios
estipuláronse para non entorpecer o tráfico rodado e de viandantes,
explicou o Concello, engadindo que os datos obtidos deste trazado
servirán como base para os proxectos que se poñan en marcha no
Living Lab de Vodafone que se iniciará o próximo ano. Neste
laboratorio en vivo empresas e emprendedores poderán colaborar na
mellora dos dous vehículos deseñados pola compañía de
telecomunicacións xunto coa empresa privada Phebus e a Universidade
de Deusto.
Durante
o percorrido por parte da zona vella da capital galega recolleuse
información sobre as áreas polas que pasa o transporte de
mercadorías e tamén sobre o subsolo da zona monumental. Estes datos
permitirán ao Concello de Santiago dispoñer, por exemplo, dun mapa
case exacto da rede de auga para, no caso de que se produza unha
avaría, saber onde actuar sen danar o patrimonio.
O
Living Lab de Vodafone está enmarcado no proxecto de
desenvolvemento de vehículos eléctricos autónomos modulares da
iniciativa Smartiago, un conxunto de solucións innovadoras postas en
marcha polo Concello de Santiago co obxectivo de “mellorar os
servizos públicos a través da implicación de compañías con gran
capacidade tecnolóxica, universidades e empresas locais en liña cos
obxectivos dos fondos FEDER 2014-2020”.
O
obxectivo principal do Concello é “promover unha mobilidade
intelixente e sustentábel que mellore a calidade de vida da
cidadanía e que, ademais, poida adaptarse a outras Cidades
Patrimonio de España”.
Vodafone,
dentro da iniciativa Smartiago, desenvolveu dous vehículos
intelixentes para mellorar a loxística de última milla: aquela
relativa á xestión do transporte de paquetería centrada no último
traxecto que debe realizarse na entrega final.
Para
iso, ambos automóbiles dispoñen de sensores LiDAR e cámara para
recoñecer o que sucede ao seu arredor, así como un sistema de
comunicacións que permite a súa monitoraxe e a comunicación con
outras infraestruturas da cidade.