O usuarios de telecomunicacións deste país califican cun notable ao seu operador
martes, 22 de decembro do 2009
Para levarnos a
contraria a todos aqueles que pensamos que as operadoras de telefonía deste país
aprovéitanse dos seus clientes con tarifas e horarios irrisorios, o Ministerio
de Industria, Turismo e Comercio vén de publicar os
resultados dun estudo sobre a calidade percibida polos usuarios na prestación
dos servizos de telecomunicacións, e as conclusións non poden ser máis
optimistas.
En xeral,
segundo este informe, os usuarios outorgan unha calificación de “notable” ao seu grao de satisfacción
sobre a prestación dos servizos de teléfono fixo, móbil e acceso a Internet en
España, sendo o aspecto que máis valoran a calidade das comunicacións, seguido
da claridade na factura e a cobertura da telefonía móbil.
Malia que o
aspecto menos valorado é o prezo, os usuarios demostran “un escaso interese por informarse sobre as características das ofertas
existentes con carácter previo á contratación” e preto da metade dos
usuarios aseguran “non terse informado máis
alá do contido da publicidade”.
Asemade, existe
un gran descoñecemento por parte dos usuarios da tarifa concreta que
contrataron e a utilización dos servizos de atención ao cliente multiplícanse ao
ano seguinte á contratación.
O estudo parte da realización por parte
do Centro de Investigacións Sociolóxicas (CIS) de
4.593 entrevistas nos domicilios, a persoas de máis de 18 anos e localizadas en
412 municipios e 50 provincias, o que lle confire un alto nivel de
representatividade dos resultados, en contraposición con outros estudos
baseados en respostas espontáneas de usuarios.