O uso profesional das redes sociais centra un obradoiro da Cámara de Santiago, impartido por Javier Rocamora
martes, 17 de novembro do 2020
A
Cámara de Comercio de Santiago vai organizar na recta final de
novembro un obradoiro moi acaído para as empresas e persoas
autónomas que queiran mergullarse de cheo nas redes sociais e
tirarlles o máximo proveito para incrementar a produtividade das
empresas e chegar a novos mercados e audiencias. Estamos
a falar do curso Uso profesional das redes sociais, unha
actividade de formación gratuíta que será impartida por Javier
Rocamora.
Desenvolverase
entre os días 23 e 27 de novembro, en formato online e
en horario de 10.00 a 13.00 horas. O curso está especialmente
dirixido a empresas e profesionais do comercio de proximidade e da
artesanía.
Segundo
informa a Cámara, trátase de dotar aos asistentes dunha visión
estratéxica sobre a mercadotecnia en liña e o papel das redes
sociais, amais de formalos para que “poidan autoxestionar os perfís
en redes sociais con criterios profesionais” e, tamén para que
estean en disposición de realizar campañas sinxelas de publicidade
a través dos novos servizos-comunidades dixitais.
Respecto
da persoa encargada de impartir os contidos, Javier Rocamora, é un
dos grandes expertos da nosa terra nas novas correntes da xestión
comercial, amais de consultor autónomo e formador especializado
neste ámbito en concreto. Rocamora publica de xeito regular artigos
en Marketing For eCommerce, unha das publicacións online
de referencia a nivel nacional en comercio electrónico. Entre seus
proxectos máis destacados figuran a redacción de contidos no
proxecto Vendes en Internet? da entidade estatal Red.es, o
deseño e implantación da estratexia dixital a nivel europeo da
multinacional islandesa Saeplast, a xestión da campaña estival na
Rede de 2017 para Turismo de Galicia e o Camiño de Santiago ou a súa
participación en proxectos para Telefónica, Applus, Carrefour,
Media Markt, Grupo Vegalsa-Eroski, Pescanova, Elogia Media, BAP
Conde, Roi Scroll e un longo etcétera.