O uso dos móbiles nos centros educativos no tempo de lecer estará regulado por un protocolo
venres, 29 de decembro do 2023
O
uso dos teléfonos móbiles nos centros educativos no tempo de lecer
xa ten o seu protocolo de regulamento. Os detalles deste marco de
actuación foron dados a coñecer pola Xunta Autonómica de
Directores (onde están representadas as direccións dos centros
públicos) aos representantes das direccións dos centros
concertados, así como aos representantes das principais asociacións
de nais e pais, en varias reunións co equipo da Consellería de
Cultura, Educación, FP e Universidades. Nel recóllese estender a
restrición do uso de móbiles e dispositivos electrónicos á
totalidade da xornada escolar.
Deste
xeito, non se permitirá o emprego libre destes dispositivos nos
períodos non lectivos, que son as entradas e saídas do centro, o
tempo de recreo, o comedor escolar e os períodos dedicados a
actividades complementarias e extraescolares.
Esta
limitación estará vixente á volta das vacacións de Nadal nos
centros sostidos con fondos públicos. No caso dos centros que
imparten ensinanzas de FP de Grao Superior, de Réxime Especial (como
escolas oficiais de idiomas ou conservatorios, entre outros) e de
Adultos poderán non aplicar esta medida nesas etapas se así o
consideran. Así, en base á súa autonomía organizativa, poderán
adaptar o protocolo no relativo ás limitacións establecidas nos
períodos non lectivos.
Porén,
a Xunta informou que seguirá permitíndose o emprego “proporcionado
e razoábel dos dispositivos por cuestións de necesidade, medicas ou
doutra índole, sempre por motivos xustificados, atendendo ás
circunstancias e autorizado pola dirección do centro”. Así mesmo,
“mantense a posibilidade do uso pedagóxico destas ferramentas,
sempre baixo supervisión do profesorado”.
Vixente
xa no 76% dos centros
O
Goberno galego explicou tamén que “logo dunha análise sosegada co
conxunto da comunidade educativa, e analizada a experiencia positiva
na maioría dos centros (o 76% deles) que, dentro das súas normas de
convivencia, xa teñen restrinxido o uso de teléfonos móbiles nos
recreos, consideramos positivo estender estas boas prácticas ao
conxunto do sistema, atendendo ao consenso e á demanda social
manifestada”. Así pois, engadiu a Consellería de Educación,
“búscase avanzar na responsabilidade compartida dun uso seguro e
saudábel das novas tecnoloxías, así como no fomento da cidadanía
dixital responsábel na nenez e na adolescencia, e compaxinar isto
coas potencialidades de aprendizaxe que ofrecen estas ferramentas.
O
mencionado protocolo terá un carácter básico e deberá ser
contextualizado ou adaptado ao centro educativo e á súa contorna
para, finalmente, ser incluído nas normas de convivencia. Ademais,
os servizos de Inspección Educativa serán os encargados de prestar
o asesoramento necesario aos centros e a supervisión na adaptación
ao novo texto. En paralelo, iniciaranse os trámites oportunos para a
actualización do Decreto 8/2015, polo que se desenvolve a Lei
4/2011, de convivencia e participación da comunidade escolar en
materia de convivencia.
Así
mesmo, establecerase un plan de formación para acompañar ás
familias no uso responsábel dos móbiles, para o que contarán co
apoio da Xunta de Galicia.