O tesouro rupestre da comarca de Compostela contará en breve cunha web de seu
xoves, 5 de setembro do 2019
O
noso pasado megalítico vai dispor en datas vindeiras dunha nova e
salientábel páxina web de divulgación, formación e posta en
valor. Así
o anunciaron onte a Deputación da Coruña e os Concellos de Ames,
Brión, Santiago, Teo, e Val do Dubra, durante o transcurso dunha
nova xuntanza da dirección do proxecto Compostela Rupestre. A
nova web será, precisamente, o espazo en liña do parque Compostela
Rupestre. Incluirá centos de imaxes e información histórica e
práctica do conxunto patrimonial dos cinco devanditos concellos.
A
liña temática principal da xuntanza de onte foi avanzar na
consolidación do que será o dito parque, cuxo obxectivo é
“diversificar a oferta turística dos concellos da comarca por
medio do importante tesouro patrimonial prehistórico deste
territorio e achegar á veciñanza a este importante legado”.
En
termos concretos, trátase de difundir, protexer e poñer en valor os
petróglifos dos cinco concellos e outros elementos de grande valor.
Segundo
fixo saber na xuntanza Xosé Regueira, vicepresente da Deputación e
responsábel das áreas de Patrimonio e Turismo, “o proxecto ten
por diante uns anos fundamentais para a súa consolidación e deseño
de futuro”. Tamén enxalzou “o compromiso e o traballo
colaborativo dos cinco concellos implicados no proxecto Compostela
Rupestre para o que a Deputación da Coruña destina 500.000 euros”.
Como
dixemos, na xuntanza presentouse a páxina web de Compostela Rupestre
que suporá, en palabras das ditas entidades, “unha das principais
ferramentas de difusión do parque e ofrecerá información e imaxes
sobre o conxunto arqueolóxico, descrición dos petróglifos máis
importantes e rutas para coñecer o patrimonio rupestre do
territorio”.
A
páxina, que estará operativa en datas vindeiras, inclúe máis de
duascentas fotos e información histórica e práctica do conxunto
patrimonial dos cinco concellos.
Na
reunión tamén participou o arqueólogo Mario César Vila, dando
conta do proxecto de revisión documental, catalogación e selección
para a posta en valor e adquisición de terreos dos petróglifos e
xacementos rupestres catalogados nos cinco concellos como paso previo
á elaboración do plan director. O proxecto contempla distintas
fases de traballo que van desde a propia redacción inicial até a
memoria final pasando por traballos documentais e de xestión da
información ou execución de traballos de campo (prospección, toma
de datos, rexistro fotográfico, avaliación de danos e topografía).