O teletraballo en Galicia será o tema central dun seminario da USC
martes, 27 de outubro do 2015
Será
o vindeiro 10 de novembro cando teña lugar o Seminario
Teletraballo, Territorio e Cambio Social en Galicia, un encontro
que terá lugar na Aula 14 da Facultade de Xeografía e Historia de
Santiago de Compostela organizada polo grupo de investigación
Sociedade, Tecnoloxías e Territorio (gis-T). O dito evento quer
servir de punto de encontro de especialistas procedentes das
universidades de Santiago, Porto, Braga e da Autónoma de Barcelona,
así como a profesionais vinculados coa análise social e
territorial, coa enxeñaría informática e das telecomunicacións,
teletraballadores/as en activo, representantes sindicais e
responsables da xestión do programa de teletraballo na
administración autonómica galega.
Emporiso, dende a
organización deste seminario parten da idea de que o teletraballo
“permite grandes posibilidades para o desenvolvemento de espazos
urbanos e rurais”. Co obxecto de establecer paralelismos con
Galicia, toman como exemplo o proceso de descentralización
xeográfica do goberno irlandés “que permitiu deslocalizar
traballadores públicos dende a capital do Estado, Dublín, cara a
pequenas cidades e vilas cabeceira de comarca rural”. Apuntan que a
decisión permitiu desconxestionar o centro urbano da capital ao
tempo que se xeraron “plusvalías económicas e se fomenta a
conciliación da vida familiar e laboral”. Outras vantaxes apuntan
á mobilidade eficiente ou ao rexuvenecemento da demografía local.
O programa no que se tentará reflexionar sobre a operatividade
do teletraballo na comunidade galega, comezará coa análise da súa
introdución na administración autonómica galega e continuará con
diversas experiencias en Cataluña, Francia e Canadá, así como
diversas experiencias desenvolvidas en Galicia e Portugal.