O servizo en liña para vítimas da violencia de xénero contabilizou 90 consultas
luns, 2 de xullo do 2012
A Secretaría Xeral da Igualdade vén de facer reconto do acadado, ao
longo do primeiro semestre deste ano, polo seu servizo xurídico online para mulleres e vítimas de
violencia de xénero. Estamos a falar, en termos concretos, de 90 consultas
efectuadas a través de igualdade.xunta.es,
a web que dá acubillo ao devandito servizo, un recurso que xurdiu co obxectivo
de dar resposta rápida e de balde ás persoas vítimas da violencia que requiran
axuda e asesoramento.
Por provincias, o
maior volume de consultas neste período procede da Coruña con 46, seguida de
Pontevedra con 32, Ourense con 5 e Lugo con 4, ás que se engaden 3 procedentes doutras
comunidades autónomas. As principais usuarias son mulleres, 75, pero tamén se
rexistraron 15 consultas formuladas por homes.
Por tramos de
idade, informa a Secretaría Xeral, as persoas de 26 a 45 anos representan o 71%
das usuarias do servizo; o 37% das consultantes son persoas con estudos universitarios
e, por temática, encabezan as entradas as relacionadas coas agresións acceso á
asistencia xurídica gratuíta cun 17%, seguidas por asuntos relacionados coa
conciliación familiar, coa violencia de xénero e co dereito de familia.
O servizo en
liña, posto en marcha o pasado mes de outubro, ofrece resposta
en tempo real a consultas sobre lexislación, violencia de xénero, conciliación,
dereito de familia, agresións ou acoso sexual, entre outras, asegurando a confidencialidade.
“A través del”,
engádese, “as mulleres dispoñen dunha
plataforma para acceder a información e asesoramento sobre os seus dereitos,
que facilite a adopción das decisións máis axeitadas”.