O servizo YouTube, denunciado pola SGAE xaponesa

Google YouTube.com tivo que retirar da súa coñecida páxina até 29.549 arquivos de vídeo trala demanda dun grupo xaponés de empresas de medio que alegou violación da propiedade intelectual. Estes vídeos de televisión, música e películas non contaban co permiso dos propietarios dos dereitos de autor dos mesmos, polo que a Sociedade Xaponesa de Dereitos de Autores, Compositores e Editores, a SGAE xaponesa con sede en Tokío, viuse na necesidade de demandar ó popular servizo.
O grupo denunciante, que representa a 23 empresas mediáticas, nas que se inclúen cadeas de TV e distribuidoras de películas, pídelle a YouTube que estableza outras medidas para bloquear a publicación de arquivos non autorizados, así como que respecte os video clips protexidos pola lei de propiedade intelectual daquel país. A compañía afectada, que ofrece máis de 100 millóns de vídeos ó día na súa páxina de balde, deféndese das queixas dos autores alegando que non pode rastrexar os que son piratas.