O sector agroalimentario medrará grazas á creación do polo de innovación de Gradiant e a USC
venres, 7 de outubro do 2016
Dende
Código
Cero xa falamos do polo de innovación dixital para o sector
agrolimentario galego, unha achega do Campus Terra da USC e o
Centro Tecnolóxico Gradiant. A xornada
de presentación do polo de innovación dixital para o sector
agroalimentario galego reunía onte no Campus Terra da USC a máis de
80 axentes do sector, entre eles: o vicerreitor Javier Bueno; o
director de Gradiant, Luis Pérez, e a conselleira de Medio Rural,
Ángeles Vázquez. Indo á proposta, dicir que nace coa vontade de
potenciar a imaxe de Galicia dentro de Europa como rexión dinámica
e innovadora neste eido, amais dunha ferramenta acaída para impulsar
a bioeconomía e a economía rural a través da fixación de
actividade económica e da xeración de empregos de alta capacitación
no rural.
Segundo se apuntou na
presentación deste proxecto, este polo de innovación dixital
permitirá ao sector agroalimentario mellorar a súa sustentabilidade
a través do uso das TIC, ao tempo que fortalecerá
o sector TIC galego como provedor de solucións tecnolóxicas para o
agro.
Entre
os obxectivos a cumprir por esta ferramenta de innovación dixital
para o sector agroalimentario galego están: o fortalecemento do
ecosistema de innovación en Galicia mediante este polo, que servirá
de ponte entre oferta e demanda e como canle de acceso a recursos
para experimentación e formación, ou como instrumento de promoción
de proxectos colaborativos e de xeración de masa crítica no sector
agroalimentario galego. Este polo quer converterse nun socio
estratéxico da Administración na introdución da estratexia RIS3 e
tamén na articulación de medidas de apoio específicas para o
sector a través da innovación.
Engadir que na
presentación de onte tamén se trataron novas posibilidades de
capitalización do coñecemento existente nos centros de
investigación e innovación galegos. Logo, diversos relatores
trataron os programas de financiamento para a dixitalización dos
sectores primarios, como é o caso da Axencia de Modernización
Tecnolóxica de Galicia (AMTEGA). A experiencia de aplicación de
ferramentas TIC á compañía vitivinícola
Martín Códax, o emprego de solucións dixitais na
cooperativa agraria Os Irmandiños,
e o estudo do caso de modernización dixital da industria leiteira
Feiraco completaron o abano de temas a debate nesta sesión.