O reto para facer un filme en 48 horas chega o día 19 de abril á Coruña
xoves, 28 de febreiro do 2013
Que ninguén se sorprenda
se a partir do 19 de abril sae a pasear pola Coruña e pensa que está
nuns estudos de cinema dos que non hai xeito de arredarse. De feito,
a cidade vai acoller os días vindeiros, entre o 19 e o 21 de abril,
unha chea de directores novos dando renda solta ao seu talento, á
súa creatividade e, sobre todo, á súa capacidade para filmar e
contar unha historia o máis rápido e eficazmente posíbel (a toma
perfecta). Estes son alicerces da actividade 48
Hour Film Project, unha iniciativa internacional que xa andou por
outras cidades estatais e
chega agora á nosa terra para retar aos nosos creadores a facer
unha película, como se pode deducir do nome do proxecto, en só dúas
xornadas.
O 48 Hour Film Project,
máis polo miúdo, é unha fin de semana na que diferentes grupos de
rodaxe son convidados a realizar unha película (escribila, rodala,
editala e estreala) en 48 horas. O funcionamento é así: o venres 19
pola noite procederase a propoñer e elixir un personaxe, un elemento
a incluír no libreto, unha liña de diálogo e un xénero, cuestións
que deben ser desenvolvidas no seo das películas para, dous días
máis tarde, seren entregadas. Estas serán presentadas ante o
público no Centro Ágora da Coruña o venres 26 de abril, onde o
xurado seleccionará a mellor de entre tódalas achegas. Os gañadores
entrarán na carreira para acadar as máximas honras a nivel
internacional no marco do The 48 Hour Film Project 2013, onde se
elixirá a mellor obra do ano. As películas tamén competirán na
Sección de Curtas do Festival de Cannes.