O reputado mentor Marc Vidal achegará a súa experiencia na internacionalización da galega Cilenis
martes, 4 de decembro do 2012
A
empresa galega Cilenis, da que
temos falado en Código Cero con motivo do
seu conxugador de verbos, vén de formalizar unha importante
colaboración de cara ao seu afianzamento en mercados alleos. Máis
polo miúdo, a colaboración vén da man de Marc Vidal, reputado
analista económico e mentor de proxectos tecnolóxicos de éxito.
Esta alianza, sinalan fontes da start-up
galega con orixe no labor despregado en tecnoloxías e lingüística
por un grupo de investigación da Universidade de Santiago, responde
a unha aposta firme a prol da internacionalización. “A
nosa”, engaden, “é
a primeira firma innovadora galega que conta co respaldo de Idodi
Labs, a compañía de Marc Vidal”.
Lembrar
que Cilenis dedícase sobre todo ao
desenvolvemento de produtos e solucións nos eidos
do procesamento da linguaxe natural e a enxeñería lingüística. As
versións para teléfonos móbiles dos seus conxugadores de galego,
español e portugués son un claro exemplo deste traballo
innovador de clara proxección alén das nosas fronteiras. Esta arela
de ver e actuar máis alá da nosa terra
atopa, en palabras dos responsábeis de
Cilenis, un importante pulo co acordo presentado este luns 3 de
decembro, que “permitirá contar coa
experiencia de Marc Vidal como mentor,
apoio no desenvolvemento técnico e económico e o impulso no proceso
de internacionalización, para o que Cilenis disporá das sedes de
Idodi en cidades como Londres, Dublín, Panamá, Boston, Los Ángeles,
Lisboa e Kuala Lumpur entre outras”.
A alianza concretouse
este luns día 3 nunha reunión de Marc Vidal co equipo de Cilenis en
Santiago de Compostela. A xornada completouse cun almorzo con
profesionais vinculados ás tecnoloxías da información da
Universidade de Santiago e do ámbito empresarial, como Alberto
Lázaro (Tuapli), José Ramón Pichel (Imaxín Software), Manuel
Quintanar (subdirector do Hostal dos Reis Católicos), Mabela Casal
(directora da Biblioteca da USC) e os membros de Cilenis Isaac
González e Pablo Gamallo, con Juan José Gómez, xerente de Unixest,
como anfitrión.
A orixe e o alicerce
de Cilenis
Cilenis é unha empresa
spin-off creada por membros do grupo de investigación
ProLNat@GE da USC, dirixido polo profesor e investigador Pablo
Gamallo. Cilenis ofrece produtos e solucións avanzadas nos eidos do
procesamento da linguaxe natural e a enxeñería lingüística,
aplicando o desenvolvemento tecnolóxico aos recursos lingüísticos.
Marc Vidal e Idodi
Labs
Marc Vidal é un analista
económico especializado en nova economía, escolmado en 2010 como
unha das dez persoas máis influentes de Internet en España. Logo de
traballar como consultor en modernización e internacionalización de
grandes empresas, emprendeu unha nova etapa profesional centrada nas
start-ups, empresas innovadoras cun gran potencial de
crecemento. Fundou cinco empresas nos últimos cinco anos, que dan
traballo a máis dun cento de persoas en América e Europa. Segundo
nos fai saber a Universidade de Santiago, o seu principal proxecto na
actualidade é Idodi, que agrupa Idodi Internacional, Idodi Corporate
e Idodi Labs. É a través desta última que Marc Vidal crea e
impulsa novos proxectos, construíndo unha rede de empresas
tecnolóxicas da que agora forma parte a galega Cilenis.