O proxecto Petíscame (USC) constata a eficacia do formato podcast para mellorar a experiencia educativa
luns, 10 de xullo do 2023
A profesora Rocío García Pedreira, docente da
Facultade de Formación do Profesorado do Campus de Lugo (USC)
impulsou un proxecto que reivindica o formado podcast como ferramenta
de gran utilidade e proxección para o ámbito educativo do ensino
superior. Trátase
do proxecto Petíscame. Videopodcast sobre libros e ilustración
con creadoras galegas, experiencia educativa na que
tomaron parte como protagonistas preto de medio centenar de
estudantes que aspiran a ser docentes. Os resultados do proxecto
foron finalmente “óptimos no plano educativo”, salientou García
Pedreira, poñendo o foco “na mellora da atención por parte do
alumnado e da súa motivación, así como na ampliación e na
adaptación de contidos con ritmos máis dinámicos”.
A profesora tamén destaca outras vantaxes, como a
súa capacidade para “rachar coa estrutura ríxida da docencia
tradicional e par avanzar na innovación en estratexias e procesos
educativos”, ao que se engade a aprendizaxe ou familiarización do
uso de novas tecnoloxías, a mellora da comunicación e expresión
oral, o desenvolemento de capacidade de traballo en equipo ou de
habilidades sociais.
A ampliación das canles de comunicación, e en
consecuencia a posibilidade de acadar unha interacción social maior
e máis ampla, a promoción do coñecemento libre de forma sinxela e
a demanda, así como a promoción de valores e liberdades constitúen,
segundo comenta García Pedreira, “outras potencialidades que
dispensa o formato podcast, un recurso novo e aliñado coa era
dixital que tamén estimula a creatividade”.
Logo de varios meses de intenso traballo, García
Pedreira fai un balance netamente positivo da primeira tempada de
videopodcasts ao abeiro do proxecto Petíscando Libros e
confía en dar continuidade á iniciativa, cuxa primeira edición
tivo por obxectivo a produción dun videopodcast de divulgación en
galego con perspectiva de xénero sobre o mundo dos libros e da
ilustración a partir de entrevistas a creadoras.
Os distintos capítulos que compoñen este
videopodcast foron deseñados e gravados integramente polo alumnado,
que tamén participou nas labores de difusión e promoción dos 8
capítulos, que xa están accesíbeis en formato vídeo, na canle
Petíscame
Videpodcast-Youtube, e en audio, en Petíscame
Videopodcast-Ivoxx.