O proxecto NACCE para a colaboración TIC entre ámbalas beiras do Miño preséntase o mércores en Ourense
venres, 14 de outubro do 2011
O proxecto NACCE,
do que xa
temos falado en Código Cero este verán, está a coller novos folgos na súa
arela de fomentar entre as empresas de ámbalas beiras do Miño unha fórmula que,
a xuízo dos impulsores deste programa, preséntase como a máis axeitada para o
mercado global: a fórmula do traballo en común, ombro con ombro. O proxecto,
dirixido a compañías, profesionais e estudantes do eido tecnolóxico-dixital, de
Galicia e do norte de Portugal, basea as súas accións na seguinte serie de
puntos específicos: mellorar a competitividade das empresas existentes, crear
outras novas baseadas no coñecemento e na innovación e dar saída a aquelas
persoas con ideas emprendedoras de alicerce tecnolóxico, de Rede ou de contidos
dixitais. Todo isto co mundo, o mercado internacional, no punto de mira. Por
certo que o programa preséntase
este mércores 19 en Ourense, no Campus.
O proxecto insírese no marco da segunda
convocatoria do Programa de Cooperación Transfronteiriza España–Portugal
2007-2013, e está liderado pola Consellería de Traballo e Benestar do Goberno
galego xunto con AGESTIC – Asociación galega de empresas TIC-, a Cámara de
Comercio de Vigo, a Universidade de Vigo, AIMinho – Associaçao Empresarial e máis
o CCG/ZGDV – Centro de Computaçâo Gráfica.
Nacce é un espazo de colaboración e, tamén,
unha páxina web onde se materializa e se lle dá forma a esa colaboración.
Ademais disto, é unha rede integrada por socios e por colaboradores que se
dedican a fomentar a formación e o asesoramento entre as nosas empresas, sobre
todo nas de pequeno e mediano tamaño, de ámbolos lados da fronteira, coa
finalidade de ampliar a cifra de negocios e impulsar o medre. O “catalizador” deste tecido, o elemento de
unión, é a rede devandita, baseada en tecnoloxías sociais, 2.0, que se dirixen
a fomentar o diálogo e a participación nun obxectivo común. No seu seo están a
coller corpo diferentes eventos, presenciais, de diálogo e colaboración: foros
de innovación e apertura de fronteiras, mesas de traballo sobre a posta en
marcha de todo tipo de iniciativas TIC de mercado. Asemade, inclúese a
formalización dunha oficina de asesoramento a empresas do sector en materia de
internacionalización.
Como dixemos, o proxecto preséntase polo miúdo este mércores día 19 en Ourense, no Edificio
Politécnico do Campus, contando cun nutrido grupo de profesionais TIC do
panorama galego e portugués e, en xeral, peninsular. É o caso de Pau
García-Milá, gañador do premio Príncipe de Asturias e de Xirona Impulsa
Empresa 2010 e autor do libro Está todo por hacer (Cuando el mundo se derrumbe, hazte
emprendedor);
Alejandro Suarez, autor do libro Ha llegado la hora de montar tu empresa, David Bello, director
xeral de IP Global ou Iago Soto, socio de Quobis Network, entre outros.
A xornada de presentación contará coa presenza da Conselleira de
Traballo e Benestar, Beatriz Mato e de representantes de tódolos socios do proxecto:
AGESTIC (Asociación Galega de Empresas TIC), Cámara de Comercio de Vigo,
Universidade de Vigo, AIMinho (Asociación de empresas do norte de Portugal) e o
CCG (Centro de Computaçao Gráfica).