O programa de dixitalización Reiníciate da Deputación de Lugo xa beneficia a un centenar de pemes
martes, 9 de novembro do 2021
A
Deputación de Lugo puxo en marcha esta tempada un ambicioso programa
para lograr que a dixitalización chegue á meirande cantidade
posíbel de pemes da provincia. Estamos a falar de Reiníciate, que
vén de ser obxecto dun primeiro balance por parte do presidente da
institución José Tomé. Fíxoo nun encontro con empresarios do CCU
Monforte de Lemos, aos cales lles presentou os detalles do programa,
posto en marcha en colaboración coa Escola de Organización
Industrial (EOI). Segundo lembrou, Reiníciate vén cun orzamento de
1M€ para prestar apoio gratuíto a pemes e autónomos da provincia
con vistas mellorar o seu negocio a través da dixitalización. Máis
de 100 empresas xa están a afrontar os primeiros desafíos que
arrancaron en Lugo, Vilalba, Viveiro e Antas de Ulla.
José
Tomé explicoulles que este novo programa da Deputación forma parte
do Plan de Impulso da Economía da Provincia lanzado pola Deputación
para favorecer a recuperación do tecido produtivo fronte ao impacto
da pandemia. “Trátase dunha iniciativa de formación e de
asesoramento personalizado que ofrecemos de maneira totalmente
gratuíta ás empresas para axudarlles a aproveitar os recursos das
novas tecnoloxías para modernizar e mellorar o seu negocio”,
subliñou o presidente, engadindo que a intención é que as empresas
“gañen en competitividade, en produtividade, en eficiencia, para
que abran novas oportunidades de negocio e, polo tanto, para que
teñan ferramentas que lles sirvan, por un lado, para recuperarse
antes e de maneira máis sustentábel no tempo dos efectos da crise
da COVID e, ao mesmo tempo, para que poidan incluso estar mellor
preparadas de cara a futuras situacións adversas”, explicou.
Na
reunión tamén participaron representantes da empresa encargada de
impartir a formación e facer o asesoramento personalizado, así como
persoal da área de Promoción Económica e Social da Deputación de
Lugo.
Segundo
indicaron, máis de 100 empresas xa iniciaron o seu desafío
particular do programa que arranca cos asesoramentos individuais onde
se avalía a situación particular de cada unha. “Agora mesmo”,
sinalou o presidente, “están nesta fase nos municipios de Lugo,
Vilalba, Viveiro e Antas de Ulla e nas vindeiras semanas arrancará
outro proceso en Lugo, Monforte de Lemos e Foz. Unha vez rematados
estes desafíos comezarán outros sete, que se adaptarán ás
necesidades detectadas nas titorías”.
A
iniciativa está dirixida a 500 empresas de calquera sector ou
actividade, e de calquera dos 67 concellos da provincia de Lugo, que
durante os próximos meses poderán participar nos diferentes
desafíos que se poñan en marcha.
Como
dixemos, o programa está promovido pola Deputación e a EOI cun
orzamento de 1.080.000€, achegados nun 85,9% pola Escola de
Organización Industrial a través do Fondo Social Europeo, que supón
927.720€. A Deputación asume o 14,1% restante, o que supón
152.279€.
A
axenda abrangue accións prácticas como a realización ou
actualización da páxina web, a creación ou mellora das redes
sociais, o posicionamento ns redes, a mercadotecnia dixital ou a
implantación de programas de xestión ou facturación, entre outras.
O
prazo de inscrición continúa aberto e pódese formalizar na web
lugoformaciondigital.es.
Habilítase o teléfono 982 26 02 04 para resolver dúbidas que
poidan xurdir.