O programa Vives Emprendes formará aos desempregados de Ames en sustentabilidade e dixitalización
mércores, 13 de abril do 2022
As
persoas
desempregadas de Ames poden acceder a partir da próxima semana á
oferta formativa da organización Acción Contra a Fame, a través
do seu programa Vives
Emprende. Este conxunto de obradoiros, impartidos en liña e de
forma gratuíta, pretenden ofrecer unha saída laboral a través do
emprendemento e da economía social, achegando fórmulas para
emprender de xeito colectivo e fornecendo de asesoramento e
coñecemento práctico sobre financiamento e axudas directas. Porán
o foco na sustentabilidade e na dixitalización como formas de poñer
en valor un novo proxecto.
O
ciclo de talleres formativos desenvolverase na segunda metade de
abril, de 10:00 a 13:00 horas a través da plataforma Microsoft
Teams. Haberá seis propostas e non será necesario que as persoas
participantes sigan todas, podendo optar ás temáticas que máis
lles interesen.
O
primeiro obradoiro será Define o produto ou servizo que queres
vender, o martes 19 de abril,e centrarase na proposta de valor e
no plan de negocio do novo proxecto. Ao día seguinte, o mércores
20, celebrarase Competencias para emprender, enfocado á
produtividade persoal. Para pechar a primeira semana, o xoves 21
porase o foco nos Modelos de negocio sustentábeis.
Xa
na segunda metade do ciclo, o martes 26 seguirá coa materia de
sostibilidade, con Taller sectorial: Turismo sustentábel.
O mércores 27 será a quenda da dixitalización, con Taller
sectorial: como montar tendas físicas e tendas online. Por
último, o xoves 28 de abril desenvolverase o último obradoiro,
Fórmulas xurídicas de Economía Social, no que se exporán
os diferentes modelos de emprendemento colectivo e os principais
trámites das súas constitucións.
Para
participar nalgún destes cursos, cómpre inscribirse na
páxina web do proxecto. Para máis información, pódese
contactar co número de teléfono 648 102 178.
A
concelleira de Promoción Económica, Ana Belén Paz, indicou que “o
Concello de Ames segue apostando pola formación, para que os veciños
e as veciñas poidan formar parte do mercado laboral ou mesmo abrir o
seu propio negocio”.