O portal Eidolocal achega máis servizos en liña para os concellos
luns, 22 de xuño do 2015
Xa hai nova versión do
portal Eidolocal, que é a porta
de entrada dos concellos aos servizos dixitais que desenvolve o
Goberno galego para reforzar a eAdministración a través da fórmula
de xuntar recursos. O portal, segundo fixeron saber a Axencia para a
Modernización Tecnolóxica de Galicia (AMTEGA) e a Dirección Xeral
de Administración Local, inclúe agora unha serie de actualizacións
que redundan na marxe de uso e na accesibilidade, amais de optimizar
a navegación e e mellorar e incrementar os servizos para as
entidades locais e os usuarios.
Ademais a web, cumprindo co Decreto sobre a presenza da Xunta en
Internet aprobado en maio, emprega xa o
dominio .gal.
Un dos novos servizos
que incorpora o portal é a Sala de Sinaturas Virtual, que
posibilita a revisión e sinatura electrónica en liña por parte
dunha entidade local de determinado tipo de documentos emitidos pola
Xunta como, por exemplo, os convenios.
Segundo informa AMTEGA,
Eidolocal.gal ofrece tamén unha nova funcionalidade para os
funcionarios do ámbito estatal, que recompila de xeito ordenado a
información sobre os concursos e procesos selectivos de funcionarios
de Administración local con habilitación de carácter nacional,
convocados anualmente (inscricións, convocatoria, cualificacións...)
e permite a xestión en liña da provisión de postos.
Entre os servizos
renovados está o de Envíos
á Xunta, concibido como
unha caixa de correo dende o que a entidade local poderá
subministrar documentación a determinadas unidades da Administración
autonómica. Igualmente, reformulouse o Catálogo de Servizos.
En canto aos espazos de
nova creación, unha das principais novidades é Meu Eido, “un
escritorio que pode configurar o propio usuario e que lle permite
centralizar súa actividade dentro do portal, agrupar
os accesos directos a contidos e servizos de uso habitual e dispor
dun taboleiro de avisos”, informa AMTEGA, que engade que o
portal conta a maiores cun novo espazo de ofertas laborais con
información das ofertas de emprego público convocadas polas
entidades locais. Para difundir e informar das actuacións impulsadas
pola Xunta para ás administracións locais habilitouse a sección
Iniciativas.