O patrimonio histórico compostelán a disposición dos internautas
venres, 23 de xullo do 2010
O persoal
responsable da área de información patrimonial do Consorcio
de Santiago de Compostela, que estes días ao igual que
tódolos veciños e veciñas da cidade andan a ultimar os preparativos que restan
para celebrar o Día do Apostol co mellor dos sorrisos, van poder disfrutar do 25
de xullo coa satisfacción de ter desenvolvido un dos servizos máis importantes
desta entidade nos últimos anos.
Trátase da mellora do Sistema de Información
Patrimonial (SIP) da Cidade Histórica de Santiago de Compostela, que se vén de activar
na Rede para facilitar o traballo de cartografía e documentación de todo o
público en xeral e dos técnicos en particular.
Desde o 2009 este sistema estaba dispoñible para
os xestores do Consorcio e doutros organismos participantes no proxecto e a
partir de agora publicarase a información Patrimonial, tanto cartográfica como
documental, na Rede, para poñela a disposición dos internautas que accedan á
ferramenta en liña.
Este sistema foi creado polo Consorcio de
Santiago de Compostela en colaboración co Centro Nacional de Información
Geográfica (CNIG), do Instituto Geográfico Nacional (IGN) do Ministerio de
Fomento. Outros organismos participantes no proxecto son: o Laboratorio de
Arqueoloxía da Paisaxe pertencente ao Consello Superior de Investigacións
Científicas (CSIC) e o Concello de Santiago de Compostela.
O SIP é un sistema xeodocumental de xestión,
inventario e administración do Patrimonio, mediante o cal é posible xestionar
de forma unificada as actuacións que se realicen, no ámbito de competencia do Consorcio, tanto de
carácter arquitectónico como arqueolóxico.
Este sistema, ademais de permitir que as persoas
usuarias empreguen de forma transparente as tecnoloxías dos SIX e de Xestión
documental, e accedan de maneira segura á información sobre o patrimonio
histórico, facilitaralle aos técnicos os seus labores diarios de xestión de
proxectos de intervención sobre elementos deste campo e apoiará os labores de
investigación sobre a cidade.
Grazas a este proxecto, a Xerencia do Consorcio
de Santiago de Compostela dispón agora dunha “potente aplicación” que lle permite visualizar e analizar a
información cartográfica dixital da Cidade Histórica; sobre ela pode situar e
relacionar todos os elementos patrimoniais e asociar, a cada un deles, o
arquivo de todas as actividades documentais xeradas polo Consorcio axudándolle
na toma de decisións e achegando un valor adicional nas súas tarefas diarias
relacionadas co Patrimonio.
O Sistema de Información Patrimonial da Cidade
de Santiago de Compostela, segundo informan dende a entidade, “pretende converterse no modelo de referencia
para os sistemas integrados de xestión de Patrimonio Histórico, que sirvan de
impulso e potencien a imaxe de Santiago de Compostela a nivel mundial”.
