O operador R baixa os prezos dos seus servizos de telefonía na Unión Europea

O operador galego R, cousa moi de agradecer nun contexto en que todo o básico sube, anunciou a finais da semana pasada que vai reducir os prezos dos seus servizos de móbil R que se leven a cabo no seo da Unión Europea. A rebaixa xa se pode apreciar este luns 2 de xullo, a xuízo da empresa con sede na Coruña “unha rebaixa sensíbel” que afecta tanto ás chamadas como ás mensaxes de texto (SMS) como tamén ás conexións a Internet móbil que se realicen dende calquera país da UE.
En virtude disto, calquera usuario destes servizos que se estea a desprazar polo cada vez máis amplo escenario xeográfico da Unión Europea e queira chamar a España, terá que pagar arestora un 17% menos. “O prezo por minuto”, di R, “será de 29 céntimos, con 14,5 céntimos de establecemento (nos que xa se inclúen os 30 primeiros segundos da chamada)”.
A maiores, recibir chamadas na Unión Europea será un 27% máis económico, xa que o custo se reduce a 9 cént/min (neste caso no hai establecemento de chamada). Asemade, as persoas que envíen SMS dende a UE verán rebaixado o custe das mensaxes nun 18%, xa que agora custan a 8 céntimos. Porén, engade a operadora galega, o que máis vai ver rebaixado o seu prezo son as tarifas de datos: conectarse a Internet móbil terá un prezo de 70cent/MB, un 65% menos.
Con todo, R segue a advertirlles aos seus usuarios que o máis recomendábel segue a ser o uso de accesos Wi-Fi de balde, co fin de conectarse a tódolos servizos da R e aforrar factura na medida do posíbel.