O novo xogo de James Bond permitirá revivir a historia de Moonraker

Confírmase que Moonraker será unha das 6 películas presentes en 007 Legends

Para celebrar o 50º aniversario da franquía do axente segredo James Bond, no outono imos ter nos cines a película Skyfall (que conta co actor español Javier Bardem entre o seu reparto), pero nos nosos fogares tamén imos ter dispoñible unha homenaxe moi especial en forma de videoxogo, 007 Legends, que en vez de limitar a súa inspiración no último filme do axente 007 tecerá a súa historia coa trama de 5 películas máis entre as que figura Moonraker como podemos ver no último trailer deste videoxogo.

007 Legends será un shooter en primeira persoa, como xa fora a adaptación de GoldenEye

Este xogo para PlayStation 3 e Xbox 360 correrá da man de Eurocom, estudo detrás do The World Is Not Enough para Nintendo 64 e do GoldenEye 007 para Wii, xunto con moitos outros títulos inspirados en franquías cinematográficas.
007 Legends xuntará 6 arcos argumentais e 8 malvados de película, permitindo revivir grandes momentos da filmografía do personaxe de Ian Flemming, facendo tamén uso dos seus moitos xoguetes e vehículos. Aparte da historia principal este título contará con outros modos de xogo entre os que destaca un modo local de 4 xogadores a pantalla partida e un modo competitivo en liña que contará con novos mapas, armas e personaxes do medio século de aventuras de James Bond.

Trailer de 007 Legends no que pode verse a parte da trama inspirada en Moonraker