O móbil perfílase como o instrumento básico dunha nova iniciativa para recuperar a práctica de ir camiñando ao cole
mércores, 8 de xaneiro do 2014
As cidades do futuro serán máis habitábeis,
seguras e limpas grazas ás novas tecnoloxías. Isto vai por todos
aqueles, nós incluídos, que de vez en cando déixanse levar por
unha concepción negativa de máis das TIC, sobre todo en relación
ás novas xeracións. Que se os rapaces son moi dependentes dos
móbiles e as redes sociais, que se aínda non saben usalos, que se
non saen da casa porque están todo o día cos aparellos. Vale, todo
iso pode ser certo de non haber unha boa supervisión, pero tamén
semella ser certo que moitas das posibilidades que teñen de facer un
mundo mellor pasan polas tecnoloxías. Hoxe toca falar dun emprego
ideal destes recursos: o que se está levando a cabo para combater o
coche no transporte aos colexios.
Falamos de alternativas ao coche que van alén de
empregar o transporte urbano e que retoman vellos hábitos: de cando
se podía xogar coa pelota na rúa sen risco de que se achegara un
deses pilotos afeccionados de Fórmula 1 que cren que o mundo é unha
pista á súa disposición. Esta iniciativa da que imos falar, a
iniciativa Trazeo, diríxese pois a permitir que os escolares
reconquisten as rúas, sobre todo nas principais cidades, que son as
que máis problemas de tráfico adoitan ter, ao mesmo tempo que se
contribúe a loitar contra o sedentarismo, a falta de autonomía e os
atrancos que un uso excesivo do coche poñen no camiño do
desenvolvemento persoal dos máis pequenos. Dito doutro xeito:
camiñar en compañía de outros rapaces é moito máis saudábel,
seguro e limpo.
Este tipo de medidas, como lembraremos, xa chegaron
á nosa terra: tanto
en Pontevedra coma en Carballo os Concellos puxeron en marcha
cadansúas iniciativas para permitir que centos de nenos tomen as
rúas cada mañá para enfiar en dirección aos seus colexios.
Trátase, tamén, de permitir un coñecemento máis amplo das cidades
nas que viven os cativos, cousa á que contribúen os voluntarios
colaboradores que se sitúan nos puntos urbanos de meirande risco e,
tamén, os comerciantes que se emprazan nas rutas e que interactúan
coa rapazada (comerciantes que sitúan en cadanseu local un
distintivo por se algún neno necesita que lle boten unha man).
Nun plano máis tecnolóxico cómpre situar a
devandita iniciativa Trazeo
Camiños Escolares, unha proposta semellante á posta en marcha
en Pontevedra e Carballo pero que afunde a súa metodoloxía nun
emprego íntegro das novas tecnoloxías da comunicación por parte
dos escolares e os seus supervisores. O proxecto, que está estes
días na plataforma Goteo procurando recursos para o deseño dunha
aplicación específica de rutas seguras, baséase en repropoñer o
concepto de camiñar ao cole e achegalo, agora, como “unha
experiencia práctica de sustentabilidade urbana, ao tempo que se
estende o coñecemento sobre as alternativas ao emprego do vehículo
motorizado”. A medida está dirixida a pais, asociacións escolares
e comunidade educativa en xeral, pero tamén aos representantes de
comercios locais, que coma no caso xa probado de Pontevedra e
Carballo, teñen perante súa unha importante oportunidade para
contribuír a crear cidades máis habitábeis e seguras. Sinalar que
tamén desenvolverían o papel de vixilantes dos espazos nos que se
desenvolven os percorridos. O resultado deste proxecto será unha
aplicación web aberta (software libre, de potencial integración en
calquera cidade) que permitirá aos usuarios organizar e xestionar
rutas: dende a aplicación, o acompañante do grupo supervisará e
xestionará elementos como o inicio do traxecto e a publicación da
posición dos rapaces ao longo de toda a liña de desprazamento (co
fin de que os pais sexan quen de visualizalo). Tamén se buscará
familiarizar aos pequenos coa tecnoloxía QR, que permita un mellor
seguimento e posibilidades de localización. Os promotores da
iniciativa xa recadaron preto de 9.000 euros, e o obxectivo é chegar
aos 15.000. Trazeo vén da man dos cordobeses Pedro Pérez, Eva Puche, Rafael Obrero e Fernando Hidalgo.