O investigador do CITIC Carlos Vázquez Cendón, nomeado editor xefe da prestixiosa revista SeMA Journal

Carlos Vázquez Cendón, investigador do CITIC (o Centro de Investigación TIC da Universidade da Coruña), vén de ser nomeado editor xefe da revista SeMA Journal: Bulletin of the Spanish Society of Applied Mathematics. Trátase dunha publicación editada por Springer e creada no seu día pola Sociedade Española de Matemática Aplicada (SeMa), entidade na que o investigador do CITIC foi presidente entre os anos 2006 e 2010.
A revista SeMa Journal informa sobre logros de alto nivel no eido das matemáticas aplicadas, cubrindo resultados tanto teóricos como numéricos, e tamén as súas aplicacións prácticas. A publicación, segundo informa o CITIC, “está deseñada para ser de utilidade especialmente para o persoal investigador máis novo”.
Carlos Vázquez coordinará o comité editorial de SeMA Journal, formado por máis de corenta profesionais asociados, que son expertos de recoñecido prestixio a nivel mundial nos temas que divulga a revista.