O hotel virtual Amateurs lanza o seu segundo libro colectivo
martes, 8 de xullo do 2014
A publicación literaria
segue a buscar o seu camiño na Rede, parecéndose cada vez máis a
outros conceptos coma o freelancing, coworking, o
crowdworking, o código aberto e o traballo en man común e
participativo. E botando man, amplamente, de metodoloxías como o
crowdfounding, unha fórmula que recupera de tempos
inmemoriais a práctica do mecenado para aplicala aos novos tempos
dixitais e en clave colectiva. O caso é que semella haber marxe para
a experimentación, non só creativa, senón a nivel distributivo. Un
exemplo disto é Amateurs, un libro de poemas, contos e
fotografías feito por moitas mans (unha boa parte delas galegas) que
agora presenta nova entrega en papel abeirándose aínda máis ao
aberto e ao solidario. E contando unha vez máis coa editorial de
Lugo Producciones El Quinto Piso (P5P).
A raizame do proxecto
(agora definitivamente achegando unha serie de lanzamentos literarios
e colectivos que se prevé longa) está no hotel virtual Amateurs
Hotel, un acubillo artístico e dixital que tamén é comunidade
2.0 de creadoras e creadores onde todas e todos temos a porta aberta
coas nosas respectivas achegas (fotografías, collages,
relatos, poemas, novelas, ensaios, ilustracións, etc) e do que xa
abrollaron primeiramente un bo número de revistas en liña. Logo
veu a primeira entrega en papel, da que falamos en detalle en Código
Cero, e a continuación (agora) a segunda, Amateurs
#02, que tamén é o resultado do proxecto cultural e social
Un
libro para ti, un para a biblioteca pública, igualmente
xurdido ao abeiro do Amateurs Hotel. Este proxecto, unha iniciativa
sen arela de lucro, consiste en que por cada exemplar mercado na Rede
se faga doazón doutro a unha biblioteca, “axudando a sensibilizar
sobre a importancia das bibliotecas, dotándoas dun fondo máis amplo
e difundindo novos talentos en fotografía, ilustración, poesía e
relatos curtos”. En definitiva, “facendo lectores dunha forma
innovadora e apoiando pola vía crowdfounding que se faga un
libro e que chegue á máxima cantidade de xente posíbel”. Neste
caso, contribuíron a facer realidade a segunda entrega de Amateurs e
o devandito proxecto un total de 150 mecenas en liña.