O grupo social Pont-e súmase ás parodias da campaña de Loewe cun vídeo de seu
venres, 23 de marzo do 2012
- Unha secuencia do vídeo promocional
Que o vídeo da campaña de
autopromoción de Loewe ía traer cola na Rede xa o vimos
vir ao momento de abrilo. De feito non tardaron nadiña en aparecer críticas
en tódalas redes sociais do país e mesmo un vídeo parodiando a estratexia de marketing seguida polos publicistas (non
sabemos se adrede ou se foi froito de mentes inocentes que viven no mesmo país
multicolor que o dos seus protagonistas).
O certo é que o grupo social
Pont-e, formado por alumnos e alumnas
do último curso de Publicidade e Relacións Públicas da Universidade de Vigo,
non quixeron deixar pasar a oportunidade de publicar un vídeo viral de seu no
que tamén parodian a devandita campaña, aproveitando así o tirón que o fenómeno
está a ter aínda nas redes sociais.
Xa que logo, o grupo
dirixido pola profesora Isabel Suárez, rodou e montou unha peza chea de humor e
ironía con algúns dos seus membros como protagonistas, que tamén está a ter
unha boa repercusión na Rede, e que xa recibiu as felicitacións de moitos
compañeiros do gremio.
Porén segundo
lemos no DUVI, dende o grupo Pont-e queren deixar claro que este vídeo
viral non pretende ser unha “simple
parodia do anuncio orixinal”, senón achegar unha crítica construtiva “sobre unha acción publicitaria inadecuada
que está creando un público refractario” afirman.
A peza
promocional de Pont-e, de máis de tres minutos de duración, recrea
personaxes e situacións reflectidas no orixinal porén con diálogos cheos de
retranca galega, cos que, de xeito indirecto, dan a coñecer a actividade do
grupo entre a comunidade internauta e crean a imaxe de marca de Pont-e.
Alén disto,
a profesora Suárez sinala que a campaña tamén lle serviu aos estudantes “como
experiencia profesional para vivir en primeira persoa como é a xestión da
comunicación online”.
O resultado
foi unha acción publicitaria “multimedia
e multiplataforma”, engade, na que o alumnado non só se ocupou da planificación
estratéxica a través de Internet, senón que foi quen de “pensar unha idea, guionizala, rodala, montala e difundila”, aclara
Suárez.
Dende que se
colgou na Rede o pasado mércores, o vídeo xa recibiu máis de 2.000 visitas e comentarios
positivos de multitude de usuarios.