O grupo galego Femxa traballa no desenvolvemento dun simulador de riscos laborais adaptábel para múltiples situacións
martes, 26 de novembro do 2013
As novas tecnoloxías
desenvolvidas dende a nosa terra seguen no seu camiño de botar unha
man aos sectores da súa contorna. No caso da iniciativa da que imos
falar a continuación, un simulador virtual desenvolvido por FCC
e o grupo galego Femxa, do
que se trata é de botar unha man ao sector da construción e máis
polo miúdo aos seus traballadores, de feito o simulador en cuestión
vai dirixido a velar pola súa seguridade. Segundo nos lembran FCC e
Femxa, estes profesionais están hoxe en día entre os máis expostos
a padecer riscos laborais de de gravidade. “Durante o período que
vai de xuño de 2012 a maio de 2013, producíronse 42.077 accidentes
leves e 553 de carácter grave, mentres que 66 terminaron en morte”,
informan.
A iniciativa na que
traballan as dúas empresas consiste nunha aplicación que recreará
situacións de perigo específicas para cada obra. Con ela, informa
Femxa dende a súa sede de Vigo, búscase aumentar a sensibilización
do persoal, mediante o uso das novas tecnoloxías da información. O
programa, entre outras cousas, reproduce escenarios cotiáns
relacionados co posto de traballo (demolicións, escavacións, uso de
maquinaria pesada, traballos en altura), “o que axuda a identificar
riscos e a actuar de maneira axeitada e segura nunha situación
real”, explica a firma que preside Patricia García. E engádenos a
propia García: “A gran vantaxe que supón o uso da realidade
virtual, como ferramenta formativa, é que durante a aprendizaxe o
traballador non se ve exposto a situacións que poñan en perigo a
súa seguridade e a súa saúde”.
Un dos piares
fundamentais deste desenvolvemento é a súa achega formativa. De
feito, o seu compoñente formativo é a clave de todo o traballo,
amais do compoñente tecnolóxico-dixital (o xeito de achegar esa
formación do xeito máis eficaz posíbel). Para FCC e Femxa, “un
traballador formado é un traballo seguro, tanto para el como para os
seus compañeiros”. As novas tecnoloxías, neste senso, xogarían o
papel de reforzadoras da mensaxe. Ou, se se quere, de canles
informativas fluídas, amplas e efectivas.
Porén, as dúas empresas
tamén advirten que o uso de simuladores non ten porqué substituír
os formatos tradicionais, máis ben do que se trata é de achegar un
complemento excepcional para os alumnos-profesionais. Estes, xa
mergullados no simulador, deberán enfrontarse de maneira intuitiva
aos diferentes situacións laborais, a xeito de retos, igual que se
se tratase dun videoxogo. Ademais, ao aloxarse nun computador pode
consultarse en calquera intre.
Segundo explicaron FCC e
Femxa, antes do comezo do desenvolvemento do simulador, analizaranse
miles de datos de sinistros laborais, así como a súa relación coas
diversas situacións posíbeis que se poden atopar nunha obra. O
proxecto, bautizado co nome de SEIRCO, será financiado polo Programa
Feder-Innterconecta e conta, ademais, coa colaboración de Imatia e o
DASA, pertencente ao Departamento de Enxeñaría de Sistemas e
Automática da Universidade de Vigo, como socios tecnolóxicos.
Para o Grupo Femxa
estamos sen dúbida ante un simulador de simuladores. Ou sexa, que
temos unha plataforma orixinal adaptábel até o infinito (pódense
facer esta base as modificacións oportunas para adaptala a calquera
situación particular). “Existen centros onde os traballadores
poden realizar prácticas con materiais reais, pero ese adestramento
só contempla casos xerais; nós cremos que, se cada obra ten
asociados uns riscos específicos, deberíase ofrecer formación
diferenciada segundo as características das mesmas e esta é a gran
vantaxe deste simulador respecto das demais ferramentas presentes no
mercado”. Para reforzar esta vertente, elaborarase un framework
avanzado de xeración automática de contornas virtuais, o que
permitirá construír cursos feitos a medida, “de maneira rápida e
flexíbel", asegura Patricia García. Deste xeito, partindo dun
escenario inicial, é posible introducir cambios na configuración da
contorna (número de operarios presentes, maquinaria e ferramentas
empregadas, condicións do terreo, etc.), para adaptar o xogo a cada
caso concreto. O simulador de simuladores permitirá formar á xente
en moi pouco tempo, mesmo a aqueles que se incorporen en calquera
momento a unha obra que xa se iniciou.