O fundador de Megaupload era o usuario con mellor puntuación en Modern Warfare 3

En plena polémica polo peche de Megaupload moitas miradas céntranse no fundador da compañía, a quen parecen querer demonizar pola súas excentricidades, o que tamén serviu para que moitos saiban dunha das súas grandes paixóns: os videoxogos. A cousa parece ser tal que Kim Schmitz/Dotcom conseguiu facerse hai unhas semanas co primeiro posto mundial no xogo Call of Duty: Modern Warfare 3, reto que rexistrou en vídeo xunto á celebración de tal logro:

Dotcom tería superado as 150.000 mortes no xogo en sesións de moitas horas (sumando 702 horas) para rachar coa anterior marca, aínda que no momento da súa detención tería chegado xa ás 180.980 mortes, polo que aínda estaría a conservar o seu liderado electrónico no xogo de Activision.
Pero o éxito do fundador no mundo dos videoxogos parece ter tantas sombras como a súa carreira profesional, xa que noutras ocasións realizou trampas para facerse con boas posicións noutros xogos en liña, de aí que hai quen sospeite dos seus logros no Modern Warfare 3.