O estado de saúde do noso litoral, ao detalle na Rede grazas ao grupo Ecotox (UVigo)
mércores, 9 de marzo do 2016
Dende 2013 está
operativa para a comunidade investigadora e para os internautas en
xeral unha ferramenta tecnolóxica que permite verificar o estado de
saúde das nosas augas litorais. Trátase do visor
cartográfico xestionado polo grupo de Ecotoxicoloxía da
Universidade de Vigo, Ecotox, que dirixe o catedrático Ricardo
Beiras. A ferramenta, que acubilla datos de case medio cento de
publicacións científicas, leva preto de catro anos suplindo con
compromiso medioambiental e vontade científica, en palabras dos seus
impulsores, “a falta de recursos tecnolóxicos da administración
pública que acheguen de xeito inmediato e xeorreferenciado datos de
vertidos e do estado da contaminación química das augas galegas”.
Máis polo miúdo, a
plataforma fornece acceso a información de contaminación química
sobre metais, hidrocarburos e probas de ecotoxicidade na costa
galega, desde 1997 ata a actualidade, agrupadas en capas, por
períodos de cinco anos. Publicacións científicas e informes sobre
contaminación mariña no litoral galego, así como traballos non
publicados polo propio grupo Ecotox, son as dúas fontes das que
proceden os datos utilizados polo visor, ao
que se pode acceder a través do portal web do equipo de
investigación.
Segundo informan os
responsábeis do recurso, este está integrado nunha infraestrutura
de datos espaciais e, en virtude disto, o visor proporciona
información sobre o estado químico das augas costeiras empregando
as directrices marcadas no programa de seguimento do convenio Ospar
sobre a protección do medio mariño do Atlántico Nordeste. Segundo
explica Raimundo Blanco, investigador de Ecotox, “hoxe en día a
información xeorreferenciada en liña está a substituír os mapas e
forma parte da nosa vida diaria, dende os teléfonos móbiles, aos
navegadores dos coches”.
Funcionamento
Unha
vez que accedemos ao portal de Ecotox podemos entrar directamente a
través do apartado accede ao visor ou ben dirixirnos ao menú
xeoportal-visor cartográfico. Neste caso, na paxina visor
cartográfico, atoparemos unha descrición dos datos e dos criterios
que se están a usar no visor. O visor presenta tres áreas: o mapa;
o panel de navegación superior e o panel lateral de capas (layers),
no que están as capas cos contaminantes e a súa lenda. No mapa a
información preséntase en forma de puntos de cores, cunha escala
que vai do azul (mellor estado) ao vermello (peor estado). Premendo
en cada punto (coa ferramenta identify do panel superior)
accedemos aos datos numéricos.