O encontro galego Meninas Jam, finalista nos Premios DeVuego 2020

Captura de pantalla do videoxogos Shipulse desenvolvido por un grupo de estudantes da primeira promoción do Mestrado en Deseño, Desenvolvemento e Comercialización de Videoxogos que se imparte na Escola Politécnica Superior do Campus de Ferrol

O encontro de desenvolvedores Meninas Jam, promovido pola Universidade da Coruña (UDC) e máis pola Asociación Galega de Videoxogos e Contidos Interactivos (Videoxogo.gal), vén de obter un importante recoñecemento ás súas contribucións creativas e dinamizadoras. En concreto, foi quen de quedar finalista nos Premios DeVuego 2020 na categoría á mellor Game Jam.
Desde o ano 2018, a Asociación Española de Videoxogos (AEVI) recoñece ao portal DeVuego como a principal base de datos do sector en España.
O encontro de desenvolvedores Meninas Jam nace en xullo de 2020 da man do coordinador do Mestrado en Deseño, Desenvolvemento e Comercialización de Videogoxos, Antonio Seoane, e da co-fundadora de Videoxogo.gal e profesora da UDC, Luz Castro, como “espazo para fomentar a creatividade e o traballo en equipo así como homenaxe ao evento iniciado en 2008 polo artista Eduardo Hermida e que converteu á cidade de Ferrol en todo un referente artístico e cultural”.
Na súa primeira edición, celebrada en liña debido á situación sanitaria derivada da COVID-19, participaron 40 persoas, boa parte delas alumnas e alumnos do grao en Creación Dixital, Animación e Videoxogos que se imparte na Facultade de Ciencias da Comunicación do Campus da Coruña e máis do Mestrado en Deseño, Desenvolvemento e Comercialización de Videoxogos que acolle a Escola Politécnica Superior do Campus de Ferrol.
Baixo a temática Barcos, Barcos e máis Barcos, elixida polos participantes, presentáronse 12 proxectos. O videoxogo gañador, Shipulse, foi deseñado por alumnado da primeira promoción do mestrado: Jesse Lago López, Pablo Boullosa García, José Luis Valenzuela Iglesias, Damián Romero Fernández e Sarai Pena López. Outro dos proxectos presentados, Fofo e a pesca do lixo, acadou o terceiro galardón nos Premios Xuventude Crea 2020 da Xunta na modalidade de Videoxogo.