O director de Produción de Programas de Mediaset estará na Coruña para afondar no contexto multimedia
luns, 19 de xaneiro do 2015
O director de Produción
de Programas de Mediaset España, Baldomero Toscano, participará o
vindeiro 29 de xaneiro na Coruña nun foro sobre a produción de
programas de lecer para a televisión no actual contexto multimedia,
que
organiza o Clúster Audiovisual Galego (CLAG) en colaboración co
Máster en Produción e Xestión Audiovisual (MPXA), título propio
da Universidade da Coruña que desenvolve a Fundación Santiago Rey
Fernández-Latorre.
O Foro A produción de
programas para a televisión no contexto multimedia. Claves para o
éxito terá lugar na tarde do xoves día 29 nas
instalacións do MPXA en Arteixo (Polígono de Sabón. Avda. de la
Prensa, 84-85). Durante este encontro cos profesionais do sector
audiovisual de Galicia e os alumnos do MPXA abordaranse “os
diferentes elementos que concorren na elaboración de programas para
a televisión, tendo en conta a influencia que están a ter outras
plataformas dixitais na produción destes formatos”, explican os
organizadores.
Lembrar que Baldomero
Toscano é o responsábel de Produción de Programas de Mediaset
desde o ano 2009. Chegou a este posto procedente da canle autonómica
andaluza Canal Sur Televisión onde foi durante varios anos xefe de
Programas e na que tamén realizou os labores de coordinador e xefe
de realización. Con anterioridade ao seu desembarco en Canal Sur
desempeñou tarefas de realización en TVE e foi director de
produción de Juan Lebrón Producciones.