O compostelán Óscar de Toro fará o Camiño de Santiago baixo a fórmula do storytelling social
xoves, 16 de xullo do 2015
O Camiño de Santiago
pódese facer no plano físico e tamén no plano dixital. Por outra
banda, nada impide facelo á vez nos dous planos, complementando un
co outro e integrándoos até que nin sequera se distingan. Esa
é a idea do compostelán Óscar de Toro a través da súa iniciativa
#OscarOnTheWay, que comeza o vindeiro día 19 no Cebreiro (Os
Ancares) e que ten como obxectivo fundamental “reivindicar o Camiño
como lugar de reflexión, encontro e solidariedade”. A acción, di
Óscar, é unha homenaxe aos camiñantes, “aos que quero agradecer
o seu esforzo e que sintan o ánimo e a hospitalidade dos galegos”.
Durante as etapas,
engade, fomentarase tamén o coñecemento da nosa terra, facendo
fincapé nos seus habitantes e, tamén, no que achegan ao mundo en
materia de produtos gastronómicos e servizos de todo tipo (aquí
entra en xogo a colaboración na experiencia de Óscar dun variado
abano de empresas galegas, ás que cómpre sumar o apio de
institucións e organismos como Galicia Calidade).
Como dixemos, o
percorrido de Óscar de Toro comeza o domingo no Cebreiro e remata o
Día da Patria, o 25 de xullo na Praza do Obradoiro. “Na acción”,
comenta Óscar, “xogarán un papel fundamental os propios
peregrinos e as redes sociais”. Así, durante o sete días de
itinerario difundirase de continuo na Internet e nas comunidades 2.0
todo o que nel aconteza. A idea, engade o protagonista de
#OscarOnTheWay, é ir alén do concepto de blogtrip, que é
dar forma a un caderno en liña de viaxes que acompañe en tempo real
á viaxe mesma. Por esta razón, Óscar impulsará a metodoloxía do
“storytelling social”, apostando por unha fórmula que inclúe,
entre outros ingredientes, unha difusión 2.0 con conexións en
directo e cun formato nun 90% de vídeo . Así, en cada unha das
etapas realizaranse a diario dúas conexións en directo, que se
poderán ver a través de YouTube, desde lugares emblemáticos e
localidades importantes e representativas do Camiño. Así mesmo, ao
longo de cada unha das xornadas diferentes pezas gráficas irán
amosando a interacción de Óscar de Toro cos camiñantes e os
produtos das empresas colaboradoras.
O seguimento das accións
poderá levarse a cabo desde as canles 2.0 de Galicia Calidade
(Youtube, Facebook e Twitter) e xa desde alí difundiranse e
compartiranse polo resto de persoas que acompañarán ao protagonista
da acción. Segundo informan, “a interactividade a través de
Twitter e Facebook será total en todo intre e poranse en marcha dous
concursos, un de fotografía do Camiño a través de Instagram, e
outro en Facebook no que o premio é unha xoia relacionada co
Camiño”.