O co-fundador do portal Boolino participa nunha xornada sobre literatura e ensino do CCG
luns, 29 de xuño do 2015
O Consello
da Cultura Galega vai organizar unha xornada de debate sobre o papel
da literatura no ensino. O encontro, previsto para o vindeiro
xoves 2 na sede do CCG en Raxoi (Santiago), centrará unha boa parte
do seu programa en avaliar as posibilidades da educación literaria
no fomento do espírito creativo, na capacidade de retención do
coñecemento e no impulso da vontade crítica. En consecuencia, entre
os piares da xornada estarán de xeito inevitábel as novas
tecnoloxías, por ser estas o vieiro ao que boa parte dos nosos
escolares acceden hoxe en día á narrativa, o ensaio ou a poesía.
Entre outros expertos nestes novos xeitos de achegármonos aos
libros, estará Sven Huber, un dos creadores do portal Boolino.
A cita, coordinada por
Dolores Vilavedra e Teresa López, chámase O ensino da literatura
a debate e está orientada sobre todo ao profesorado, para o que
se reserva o 70% das prazas. A xornada, informa a organización,
pretende tamén facer balance do lugar que vén ocupando a literatura
nos curriculos escolares e reflexionar sobre o seu ensino. Para a
coordinadora da xornada, Dolores Vilavedra, é tamén “outra forma
de abordar a cultura galega a través dun dos seus puntos fortes,
como é a literatura, na que temos autores e creadores moi destacados
e permítenos unha análise do ensino desde outra perspectiva”.
O encontro comeza coa
análise do marco legal no que se move o ensino da literatura. Para
iso estará presente Noemí Álvarez Villar, asesora en materia de
idiomas da Consellaría de Cultura, Educación e Ordenación
Universitaria. Canda ela a especialista en didáctica da lingua e da
literatura (USC) Isabel Fernández López. Modera Mariló Candedo,
presidenta de Nova Escola Galega e profesora de Pedagoxía Social
(UDC).
Abordando as implicacións
sociais e económicas da lectura, participarán na xornada o
devandito Seven Huber, co-fundador de Boolino
(portal web especializado na comercialización de libros para público
infantil e xuvenil, unha
start-up que naceu para aprender a ler a todos os membros da
familia e que xa contaba o ano pasado con máis de 70.000 títulos
dispoñíbeis); Xosé Manuel Moo, coordinador de edición educativa
de Edicións Xerais de Galicia, e María Yáñez, co-fundadora da
empresa tecnolóxica galega A
Navalla Suíza, completan este panel.
Xa na sesión da tarde
analizarase como lle afecta a contorna dixital a este temática, coas
intervencións de dúas persoas especialistas na materia. Dunha
banda, Laura Borrás, profesora de Teoría da Literatura e Literatura
Comparada (UB) e directora da Institució de les Lletres Catalanes.
Da outra, José Rovira Collado, membro do Departamento de Innovación
e Formación Didáctica da Universitat d´Alacant.
Pechan a cita as
experiencias de Espazo Lectura, da man da súa presidenta, Concha
Costas; da Editorial Galaxia, con Francisco Castro; e do Centro de
Formación e Recursos de Pontevedra, con Paco Díaz, asesor de
formación do ámbito lingüístico.