O certame Pilabot resólvese con 44 toneladas de pilas e baterías recollidas nos colexios
luns, 11 de marzo do 2019
Xa
temos datos de participación ao abeiro da campaña de
sensibilización ambiental Pilabot
que impulsa a Consellería de Medio Ambiente para fomentar a
recollida selectiva de pilas, baterías de todo tipo de dispositivos
eléctricos e electrónicos e acumuladores portátiles entre a
poboación escolar e as súas familias. A campaña, que tivo feitura
de concurso, desenvolveuse entre o 26 de novembro de 2018 e o 11 de
febreiro deste ano en
150 centros de educación primaria e secundaria de toda Galicia e que
se saldou coa recollida de preto de 44 toneladas dos devanditos
materiais.
Os
centros gañadores do certame son o CEIP de Caión (A Laracha), o CPR
Plurilingüe La Purísima (Ourense) e o CRA Amencer (Ribadavia).
Estes tres colexios conseguiron as mellores cifras de recuperación
nas dúas categorías nas que se dividía o concurso: quilos de
pilas, baterías e acumuladores recompilados nos contedores dos
propios centros; e cifras de recollida por alumno.
Máis
polo miúdo, o Centro de Educación Infantil e Primaria de Caión
levouse o primeiro posto en termos absolutos, xa que durante os dous
meses e medio que durou a iniciativa recolleu un total de 1.382
quilos de pilas e baterías nas súas instalacións. Este colexio
resultou galardoado por partida dupla, xa que tamén acadou a segunda
posición na clasificación de quilos recompilados por alumno, cun
total de 37 quilos por cada estudante.
O
Colexio Plurilingüe La Purísima de Ourense ficou en segunda
posición en canto a cifras globais de recollida, cun total de 1.115
quilos; mentres que o Centro Rural Agrupado (CRA) Amencer logrou as
mellores cifras de material recuperado en relación ao seu alumnado:
65 quilos por estudante.
Os
tres centros recibirán un recoñecemento económico que deberán
destinar á compra de material escolar ou deportivo. Os primeiros
premios de ambas categorías están dotados con 2.500 euros cada un,
mentres que os centros que quedaron en segunda posición levarán
como recompensa 1.250 euros.
A
entrega de galardóns terá lugar no Museo Pedagóxico de Galicia en
Santiago, o 4 de xuño. A este acto acudirán representantes de todos
os centros distinguidos e tamén o alumnado gañador do certame
individual de fotografía artística #eusonpilabot, que se
desenvolveu de forma paralela e co mesmo fin que o concurso de
recollida de pilas. As gañadoras deste certame fotográfico, cuxas
obras se deron a coñecer o mes pasado a través de Facebook tras
elixir as mellores instantáneas de entre os 80 participantes, son
Sofía Iglesias, estudante do CPI Castro Baxoi de Miño; Nadia
Carballo, do CEIP Lamas de Abade de Santiago de Compostela; e Nerea
López, alumna do CRA Amencer de Ribadavia.
A
campaña
A
campaña Pilabot, posta en marcha pola Consellería de Medio Ambiente
coa colaboración dos xestores de Ecopilas, ERP e Ecolec, arrincou
oficialmente o pasado 1 de outubro coa presentación e xestión das
inscricións dos centros educativos interesados en participar. En
total, 150 colexios de toda Galicia (53 da provincia de A Coruña; 15
de Lugo; 31 de Ourense; e 51 de Pontevedra) están adheridos a
Pilabot para o curso 2018-2019.
Esta
campaña incluíu como “actividade estrela” o dito concurso de
reciclaxe de pilas, de forma que os centros participantes que
conseguisen as mellores cifras de recollida recibisen un premio
económico para a compra de material escolar ou deportivo. Fixáronse
catro premios: dous, dotados con 2.500 euros cada un, para o centro
escolar que máis quilos de pilas reunise e tamén para o que máis
quilos recollese por alumno; e outros dous, de 1.250 euros, para os
colexios que ficasen en segunda posición.