O centro Gradiant achegará a Smart City Coruña a súa experiencia en obxectos intelixentes
venres, 5 de xullo do 2013
O proxecto para converter á Coruña
nunha cidade dixital (a iniciativa Smart City Coruña) vai
contar coa participación e colaboración do centro galego Gradiant
de investigación tecnolóxica. Así nolo confirma o propio
centro, que fixo acto de presenza, o pasado 21 de xuño, na
presentación da dita iniciativa coruñesa, unha proposta para
aplicar na cidade herculina as metodoloxías e os
conceptos de Smart City, que
é onde se engloba un tipo de urbe actualmente en desenvolvemento,
mellor xestionada, mantida e comunicada. Segundo indica Gradiant,
este tipo de cidades teñen entre outras características de seu o
feito de ser quen de optimizar os seus servizos a través dun uso
racional e rendíbel das TIC. “Ao seu
abeiro”, engádese, “exponse
a creación de novos métodos intensivos en comunicación de rede que
crean sistemas
reactivos que responden
en tempo real ante diversas situacións e eventos e
atenden as necesidades individuais de cada
usuario”.
Este proxecto coruñés, liderado pola
alianza formada por R, Indra, Altia e Ilux, ten como obxectivo
específico modernizar desde a súa orixe a concepción de cidade que
se ten hoxe en día, actualizando a relación dos cidadáns con
infraestruturas, servizos e goberno local, engade Gradiant, para quen
está claro que a aplicación dun ingrediente complementario, o
ingrediente da Internet das Cousas, sentará os alicerces para
servizos de valor engadido que melloren a interacción dos usuarios
coa súa contorna e optimicen tarefas de xestión e administración,
reducindo custos e creando valor para cidadáns, negocios e sectores
públicos.
Precisamente, Gradiant, en colaboración
cos demais membros da alianza empresarial, participará na definición
e creación dunha arquitectura de Internet of Things baseada
en servizos para a Plataforma Smart City Coruña que permita levar a
cabo a integración de obxectos intelixentes nun escenario de cidade
intelixente. “Búscase mellorar a oferta de servizos a
disposición do cidadán, das empresas e das administracións”,
explica o centro vigués, que engade que para esta iniciativa
“empregaranse tecnoloxías das distintas liñas de
investigación de Gradiant, como son tratamento de
imaxes en tempo real, computación na nube, big
data, que permitirán definir a seguinte xeración de
técnicas para a súa integración nas Smart Cities do futuro,
avaliando a súa aplicabilidade noutras contornas distintas ás
cidades”.