O alumnado da nosa terra xa pode inscribirse en EficienTIC 2013, dirixido a promover o sostíbel no eido tecnolóxico
xoves, 13 de decembro do 2012
O prazo de
solicitude para participar nas xornadas do programa para 2013 de
EficienTIC xa está aberto, segundo
informou o centro Gradiant (Centro Tecnolóxico de
Telecomunicacións de Galicia), impulsor desta iniciativa xunto con
EnergyLab
(Centro Tecnolóxico de Eficiencia e Sostibilidade Enerxética). Como
lembraremos, EficienTIC é un programa de actividades para o alumnado
galego de ESO e de Bacharelato, e preséntase baixo un epígrafe, O
ataque do móbil pataca!, que convida a
que se teña en conta que as novas tecnoloxías fican obsoletas co
uso e o paso do tempo e que cómpre pórse en marcha para evitalo.
Dende EficienTIC apóstase, neste senso, por tirar partido da
capacidade de inventiva e desenvolvemento (moi alta) da nosa mocidade
para facer que a tecnoloxía siga a ser rendíbel sen necesidade de
desbotala. Ou sexa, apóstase pola eficiencia e polo sostíbel.
Por
certo que os adestramentos, neste senso, desenvolveranse no edificio
de CITEXVI (sede dos dous centros organizadores),
no mes de febreiro (días 19, 21, 26 e 28)
e en marzo (días 5, 7, 12 e 14) do vindeiro ano.
Máis polo miúdo, e
segundo nolo explican Gradiant e EnergyLab, o
proxecto de divulgación científica EficienTIC consiste nun
conxunto de actividades e obradoiros
dirixidos
aos escolares de ESO e Bacharelato dos institutos
galegos, co obxecto de difundir os
conceptos básicos e as tecnoloxías máis innovadoras das áreas nas
que traballan os ditos centros,
que son as áreas da eficiencia enerxética
e das TIC.
Como dixemos, estes dous espazos de I+D
sitúanse no edificio CITEXVI (Cidade Tecnolóxica de Vigo), entidade
xestora do Parque Científico e Tecnolóxico da Universidade de Vigo,
arestora un dos edificios que máis salienta no eido estatal por ter
apostado por esixentes criterios bioclimáticos e polo emprego das
enerxías renovábeis.
Programa para febreiro e marzo
10.00 horas
Charla para introducir os aspectos
fundamentais sobre as TIC e a Eficiencia
Enerxética e actividades iniciais:
· Explicación sobre criterios
bioclimáticos do edificio a través de imaxes de CITEXVI
(orientación, lamas, etc.) así como as instalacións térmicas que
ten (bomba de calor xeotérmica, chan radiante, paneis solares,
etc.).
· Myth busters. Esta actividade
consiste en explicar falsos mitos da enerxía. É verdade que un
coche en punto morto consume menos? A eficiencia enerxética é cara?
. Telefonía Móbil. Con esta
actividade preténdese destacar a importancia da reciclaxe e a
contaminación producida por estes dispositivos electrónicos. Para
iso exporanse teléfonos dos últimos 10 anos coas súas distintas
placas nais, cos seus correspondentes condensadores de tántalo,
tirado do mineral coltan, cuxa industria comercial promove
multitude de guerras en África, en zonas de interese estratéxico.
· Tubo de Luz. Nesta actividade
amósase unha bufarda tubular que é un equipo que permite iluminar
pequenos e grandes espazos con luz natural. Este dispositivo aforra
enerxía grazas á utilización dunha avanzada tecnoloxía que
transporta a máxima cantidade de luz solar desde o exterior ate o
interior das estancias.
· Maqueta de iluminación. Con este
panel composto por diferentes tipos de luminarias (incandescentes,
LEDS, etc.) e un medidor de consumo, os alumnos poden observar as
distintas tipoloxías de iluminación que existen e o seu consumo.
Tamén se explicará a etiquetaxe enerxética.
11.00 – 13.00 horas
Obradoiros
· Xeración de enerxía pedaleando
Neste obradoiro comprobarase como o
movemento corporal permite a xeración eléctrica abonda como para
xogar e competir. Para isto disporase das seguintes montaxes:
Scalextric, indicador de Leds e cargador de móbil.
· Illamento. Co obxecto de que os
alumnos poidan ver a importancia do material usado no illamento para
a redución dos consumos enerxéticos dunha vivenda, mediante o uso
dunha cámara termográfica, estufas e distintos tipos de ladrillos e
materiais de illamento, os alumnos construirán distintos tipos de
paredes e verán a transmisión de calor das mesmas coa cámara.
· Recoñecemento facial e consellos de
aforro no consumo de computadores. Con este taller preséntanse as
tecnoloxías de recoñecemento facial e procesado de imaxe e a súa
aplicación para o aforro de enerxía. Ademais falarase do consumo de
enerxía dos computadores e de conceptos para conseguir o aforro dos
mesmos: etiquetas enerxéticas, hábitos de consumo, software,
configuración, etc.
· Hidróxeno para mobilidade. A través
desta actividade os alumnos poderán ver como a partir da luz e o
vento xérase hidróxeno e usando o mesmo, xerarase mobilidade. Coa
explicación do monitor, os alumnos deberán montar eles mesmos un
sistema de xeración de hidróxeno e o resto das partes necesarias
para o funcionamento do prototipo exposto.
· Energy Harvesting. Nesta
actividade os alumnos verán como se pode usar a calor botada a
perder por unha vela (da orde de 100 KW) para producir corrente, que
será utilizada para acender un moderno LED de potencia de alta
eficiencia e unha radio. Os alumnos interactuarán coa montaxe desta
actividade.
· Xeración de enerxía a partir de
cambios de temperaturas. Faranse dúas actividades, unha que
permitirá ao alumno xerar electricidade con auga quente/fría para a
alimentación de LED de cor vermella/azul e outra que permitirá
alimentar un aparello eléctrico grazas á calor que xera unha
persoa.
· Auditoría Enerxética.
Explicaráselles aos alumnos a forma de realizar unha auditoría
enerxética básica nos seus fogares, para que posteriormente sexa
realizada xunto aos seus profesores, e así poder obter consumos
reais e aplicar medidas eficientes coas que diminuír o consumo.