O Startup Congress Galicia reúne dúas mil persoas interesadas en novos proxectos
xoves, 31 de marzo do 2022
Comezou
finalmente un dos grandes eventos empresariais e tecnolóxicos da
tempada na nosa terra, non só polos temas a tratar e as importantes
cifras de participación acadadas senón tamén porque en certa
maneira certifica a volta a unha “semi-normalidade” no ámbito
dos grandes acontecementos TIC. Estamos a falar do Startup Congress
Galicia organizado pola Zona
Franca de Vigo. Nel participan arredor de dous milleiros de
persoas, máis de 500 de forma presencial e o resto en liña, á
procura de novos proxectos. O congreso desenvolverase até mañá
venres. É, en palabras da organización, o maior evento de
investimento en Galicia.
O
delegado do Estado, David Regades; o alcalde de Vigo, Abel Caballero,
e os co-organizadores, Lalo García e Frankie Gómez, abriron o
congreso, que, segundo fixeron saber, encherá Vigo de innovación,
novos proxectos, networking, startups, emprendemento,
investidores de toda España e “moita actividade”.
David
Regades asegurou que “o apoio aos emprendedores está no noso ADN
porque elas e eles son o inicio de grandes proxectos, de tecido
empresarial e de economía. De todo iso en Vigo sabemos un pouco”,
sinalou. Neste sentido lembrou as ferramentas do Consorcio a
disposición dos emprendedores, como ViaGalicia, ViaExterior ou a
incubadora High Tech Auto.
O
alcalde, Abel Caballero, explicou ante un auditorio de emprendedores
e investidores que “a clave son as ideas e o liderado para levalas
a cabo” e animou ás startups para “continuar o camiño e
perseverar, porque aí está clave do éxito”.
Startup
Congress Galicia acolle durante dous días a todas as aceleradoras
galegas e a máis de 50 fondos de investimento, cun amplo programa de
charlas e mesas redondas, varias salas simultáneas con relatorios,
mesas de debate e presentacións a investidores.
As
actividades comezaron este xoves 31 con varias mesas onde se vai a
analizar o futuro da industria, do retail, do deporte, a
innovación, a banca, a saúde, a loxística e a enerxía. Alí
debaterase entre actores de cada sector e entre os relatores estarán
empresas como Estrella Galicia, Zelnova Zeltia, Selmark, Abanca,
Altia, Marsan, Kaleido ou Reganosa, así como os clubs Celta,
Obradoiro e Deportivo.
De
forma paralela, o xoves, hai varias presentacións de fondos, entre
elas un fondo biotech, así como mesas de investidores e
presentacións por parte de proxectos que buscan investimento. Tamén
están programados obradoiros de temática variada que profundarán
en cuestións básicas para as startups, a preparación da
entrada de capital de socios investidores, aprender a presentar un
proxecto, como protexer unha innovación, a comunicación e as
relacións públicas para estes proxectos ou a internacionalización.
ESte
venres 1 de abril están previstas varias clases maxistrais con
emprendedores de éxito. Estará Hugo Arévalo, responsábel de
JobTalent e ThepowerMBA e que conta cunha carteira que xa superou as
30 compañías, algunhas tan destacadas como Cabify ou Glovo. Tamén
estará Luis del Pozo, CEO de Legalitas, decidido a revolucionar o
sector legal: "Queremos ser o Netflix dos avogados",
asegura. Así mesmo, contarán con Héctor Estévez, CEO da firma
viguesa Centum, que vendeu a Canadá un sistema para rescates.
As
aceleradoras Viagalicia, BFAero, BFAuto, Celta Labs, Abanca Innova,
BFFood, High Tech Auto e Connector Startp Accelerator presentarán as
súas mellores empresas aceleradas a un extenso grupo de
investidores.
Xa
para rematar a xornada do venres, o congreso Startup Congress Galicia
acollerá a Laconnetwork,
que xorde como reunión espontánea de emprendedores relacionados
coas TIC e que evolucionou ao maior evento de emprendedores de
Galicia.