O Plan de Voluntariado Dixital inicia a súa formación en Innovación e Transformación Dixital 2.0
luns, 16 de xuño do 2014
O Programa de Voluntariado Dixital da Xunta, impulsado pola AMTEGA
e a Dirección Xeral de Xuventude e Voluntariado, pon
en marcha o seu Plan de Formación 2014: Innovación
e transformación dixital 2.0 que se desenvolverá entre o 19 e xuño e o 11
de xullo.
O obxectivo deste o plan formativo é ofrecer capacitación
aos voluntarios e persoal técnico das entidades de acción voluntaria adheridas
ao Programa Voluntariado Dixital, aínda que está aberto a calquera persoa ou
organización interesada nesta materia.
O programa estrutúrase en 4 módulos de 8 horas de duración
cada un, que poden ser cursados de maneira independente:
• Módulo I: Inserción
laboral e recrutamento 2.0 (19 e 20 de xuño)
• Módulo II: Estratexias de comunicación
2.0 (26 e 27 de xuño)
• Módulo III: Innovación social.
Experiencias prácticas (3 e 4 de xullo)
• Módulo IV: Coaching para a
transformación social (10 e 11 de xullo)
As persoas interesadas deberán inscribirse en aqueles
módulos nos que desexen participar, cumprimentando
os correspondentes formularios de inscrición e recibirán un certificado de
asistencia onde se especificarán os módulos aos que asistiran.
Inserción laboral e recrutamento 2.0
No primeiro módulo do curso, que se desenvolverá o xoves 19 e o venres 20
de xuño no Centro de Novas Tecnoloxías (CNTG) de Santiago de Compostela,
presentaranse distintas ferramentas e boas prácticas para construír unha boa
imaxe dixital, fortalecer a rede de contactos de cara á procura de emprego e
proporcionarase a visión da empresa á hora de seleccionar o candidato máis
adecuado para cada posto de traballo.
Durante as dúas xornadas amosarase como, ante o antigo
modelo de Currículum 1.0 en papel entregado en man, as ferramentas 2.0 -
baseadas na interacción e a participación través de Redes Sociais-
transformaron tanto a maneira en que os demandantes de emprego dan a coñecer as
súas capacidades e habilidades, como os aspectos que os recrutadores valoran na
selección do candidato que mellor se adapta ao perfil que buscan.
Relatores
O 19 de xuño a xornada contará coa intervención do orientador laboral, Xosé
Alberte Cea Rodríguez, e exporanse dúas experiencias de recrutamento no sector
TIC galego da man da empresas Balidea e A Navalla Suíza.
O día 20 intervirá Roberto Pérez Marijuán, consultor e
formador especializado en neuromárketing e novas tecnoloxías para a xestión
empresarial, que foi responsable comercial en CAMPOFRÍO e director comercial en
VISUAL PUBLINET. Ademais, exporase a experiencia de Infojobs como plataforma
dixitais de busca de emprego.
Asistencia ao curso
O curso é de balde e poderase participar en modalidade presencial no Centro de Novas Tecnoloxías de Galicia ou ben a través de videoconferencia nas aulas CeMIT de Padrón, Sada, Ortigueira e Fisterra, na provincia da Coruña; Barreiros e O Vicedo na provincia de Lugo; Ourense, Verín, Leiro e Celanova na provincia de Ourense; Pontevedra, Valga, A Cañiza e Poio na provincia de Pontevedra.