O Plan de Formación 2011 do SERGAS tirará proveito das TIC
xoves, 27 de xaneiro do 2011
O Servizo
Galego de Saúde, da man da súa directora de Recursos Humanos, Esperanza Fernández
Lago, vén de presentar o Plan de Formación 2011 dos Profesionais do SERGAS, que
se desenvolverá dentro do ámbito da formación continuada e que xorde dun
sistema aberto e multidisciplinar.
A través desta
iniciativa, o SERGAS impartirá un total de 705 edicións de cursos das distintas
áreas do plan, nas que se ofertarán 19.000 prazas para mellorar os
coñecementos, habilidades e actitudes ante a evolución científica e tecnolóxica
dos nosos profesionais da saúde.
As novas
tecnoloxías permitirán que a formación continuada deste colectivo sexa máis próxima
e accesible, así como máis axustada ás necesidades de cada profesional.
Respecto ao
plan anterior, este novo documento presenta diversas novidades, entre as que
destaca o feito de favorecer os novos ámbitos de aprendixaze mediante o
potenciamento de novas metodoloxías docentes, aproveitando as TIC.
Do mesmo xeito,
o novo plan inclúe a formación online,
incrementándose en relación aos anos anteriores o número de actividades
formativas realizadas a través da teleformación, dado que este tipo de cursos,
segundo apuntou Fernández Lago, “amosan
unha gran demanda e aceptación entre os profesionais”.
Así, en
resposta a estas expectativas, a directora de Recursos Humanos do SERGAS
sinalou que “impúlsase o desenvolvemento
da oferta formativa a través da teleformación, permitindo unha maior
flexibilidade e adaptación ás necesidades formativas dos profesionais e
eliminando os inconvenientes inherentes á formación presencial, permitindo, en
consecuencia, un maior e máis axeitado acceso dos profesionais ás actividades
formativas”.
Para facilitar
a identificación de actividades de interese por parte dos profesionais e evitar
ao tempo as duplicidades na oferta formativa do Plan, esta organízase por áreas
temáticas, estruturándose en bloques de coñecemento.
A área que nos
compete en Código Cero, a de Tecnoloxías,
engloba todas as actividades formativas relacionadas co manexo tanto das
tecnoloxías da información e comunicación como das tecnoloxías sanitarias.
As actividades
de formación execútanse a través de dous plans docentes diferenciados: o Plan
de formación continuada do persoal de institución s sanitarias do Servizo
Galego de Saúde (Plan AFCAP) -no que se inclúen as actividades docentes que
forman parte do Plan de Formación Continuada do Persoal da Xunta- e o Plan
estratéxico de formación dos traballadores ao servizo da sanidade pública
galega (PEF), enmarcado no convenio de colaboración entre a Consellería de
Sanidade, o Servizo Galego de Saúde e a Fundación Pública Escola Galega de
Administración Sanitaria.