O Parlamento recibirá este mes novos computadores con Windows
martes, 13 de novembro do 2012
O Parlamento de Galicia vai recibir o vindeiro
día 23 os seus novos computadores, co sistema operativo Windows
instalado. Isto producirase unha semana despois da constitución da
Cámara da novena
lexislatura, cos seus 75 escanos electos. Os ordenadores foron
mercados a través dun concurso público de
urxencia posto en marcha en setembro, coa
finalidade de adquirir 85 portátiles coas súas impresoras. A
medida está a ser cuestionada porque as deputadas e deputados non
van ter opción de elixir o sistema operativo dos equipos, logo
de que nas bases do concurso se pedise, precisamente, a presenza de
Windows 7 na versión profesional, cousa que tamén afectaría ás
impresoras (que deben achegar compatibilidade coa dita ferramenta de
Microsoft). A isto, sinálase, súmanse
elevados gastos en licenzas por programas privativos.
A este baleiro nas opcións posíbeis a elixir
(opcións perfectamente válidas e operativas a través do software
libre, na liña do sistema Ubuntu que se está a empregar, con total
éxito, nos centros educativos a través de Abalar, o
programa da Xunta da Galicia para a dixitalización das aulas),
cómpre engadir o estancamento no que,
segundo apunta A Mesa pola Normalización Lingüística, ficou parado
o compromiso do Parlamento (achegado en abril de 2011) para garantir
a a atención na nosa lingua como un requisito para a vindeira
concesionaria de telefonía móbil no Parlamento. Como
sinalamos a comezos de outubro reflectindo fontes de A Mesa, o
compromiso “ficou parado coa
Cámara anovando
o contrato de telefonía sen
incluír nin tan sequera a opción de que o galego estea presente nos
terminais, a pesar de que tal opción existe no mercado”.