O Mercado de Pontevedra estreou tecnoloxía de control de capacidade con visualización en tempo real

Os accesos principais do Mercado de Abastos de Pontevedra estrearon un innovador sistema informático de control de capacidade con visualización en tempo real. A Concellería de Promoción Económica que dirixe Yoya Blanco destinou unha achega de máis de 7.000 euros á posta en marcha desta tecnoloxía, que permite contabilizar persoas e que foi instalada finalmente pola empresa Almas Industries. Proporcionará unha precisión do 95%, sendo o seu principal obxectivo achegar unha contorna “cen por cen segura”.
A estrea do servizo, instalado como dixemos nos dous accesos principais do recinto (os que dan ás rúas Serra e á avenida de Bos Aires) formalizouse a semana pasada, o xoves 3 de xuño. O equipamento inclúe cámaras con sensores, monitores de capacidade e un software específico de xestión, proporcionando unha precisión do 95% e unha área de detección de ata dous metros.
A propia Yoya Blanco achegouse ao Mercado para supervisar o resultado da instalación e comprobar o funcionamento desta “moderna ferramenta, que permitirá cumprir estritamente con tódalas restricións desta nova normalidade e converter a Praza nun espazo absolutamente seguro, axudando a previr aglomeracións e achegando moita tranquilidade a traballadores e clientes”.
E engadiu a edil: “A través dos monitores instalados nas portas de acceso podemos obter información do número de xente que hai no interior e do número de persoas ás que está permitido o acceso en función da capacidade (que nestes momentos é de 200 persoas)”.
Destacou tamén que a tecnoloxía instalada inclúe un semáforo que se ocupa de indicarnos se “podemos pasar ou non”, e así, cando está en verde temos vía libre, e deberemos agardar cando está en vermello. Asemade, “o sistema computa tamén o número total de saídas e entradas que se produciron ao longo da xornada”, dixo.