O Interplay de Carballo achéganos en setembro ao humor en liña máis disidente
mércores, 25 de agosto do 2021
A 8ª
edición do Carballo Interplay vai traer a Carballo, do 8 ao 11
de setembro, unha coidada selección do humor máis activista e
disidente da Internet española. O Festival de Contidos Dixitais porá
o foco dun xeito especial nos proxectos que empregan a Rede “como
unha ferramenta para mellorar o mundo” “e naquelas propostas que
se apoian no humor para abordar asuntos como as relacións de
parella, a saúde mental, a loita contra o machismo ou polos dereitos
do colectivo LGTBI”, explicou a organización do sobranceiro
certame tecnolóxico-audiovisual, organizado un ano máis por
Interplay Producións e o Concello de Carballo.
Segundo
engade, un dos pratos fortes deste ano será o espectáculo que
ofrecerán tres das cómicas máis relevantes do panorama estatal
actual: Henar Álvarez, Carolina Iglesias e Victoria Martín. A cita
é o venres 10 ás 22h no Pazo da Cultura de Carballo. A guionista,
cómica e comunicadora galega Carolina Iglesias (Oleiros, 1993) volve
ao Interplay para rajar sobre o divino e sobre o humano coa
súa compañeira e socia, a xornalista, guionista e colaboradora de
televisión e radio Victoria Martín de la Cova (Madrid, 1989),
despois de gañar o Premio a Mellor Serie con Válidas a
pasada edición, na que tamén lle ofreceron ao público do festival
un episodio especial do seu exitoso podcast Estirando el chicle.
Acompañaráas neste show -que se poderá ver en ao vivo,
previa retirada das entradas, e por streaming- Henar Álvarez
(Madrid, 1984), que actualmente presenta Buenismo bien (Cadena
Ser), xunto a Quique Peinado e Manuel Burque, e que ten un longo
percorrido como guionista e presentadora de radio e televisión.
Previamente,
o mesmo venres día 10, David Pareja e Lorena Iglesias, ofrecerán a
súa particular visión da Pochosfera, un completo repaso
polos momentos penosos da Internet no que non faltarán bloopers
de vídeos de ASMR, manosphera ou deepfakes de famosos
derretidos.
Ao
día seguinte chegarán Esnórquel e Perra de Satán co seu podcast
¿Puedo hablar!, onde cada semana analizan cuestións como a
saúde mental, os seus corpos, a política, a cultura, o ligoteo,
o sexo, a depresión... e moita televisión dos noventa. Esnórquel
será, tamén, o encargado de ofrecer o seu Código Fonte
Audiovisual, un percorrido por vídeos de Youtube de alcance
queer que marcaron a súa adolescencia na aldea e na
universidade.
Amais
de todo isto, o Festival Carballo Interplay falará sobre Activismo
na rede con Pol Andiñach (Vilassar de Mar, 1991), coordinador do
colectivo de xornalistas Cuellilargo e autor do libro Todo el
mundo puede ser antifa. Manual práctico para destruir el fascismo
(2021); con Laura Tabarés (León, 1991), membro do colectivo de
produción cultural especializado en virtualidade e programas
educativos con perspectiva feminista Ontologías Feministas; e con
parte da colectividade millennial Proyecto UNA, que profundan
nas guerras culturais de poder nos medios, Internet e a realidade
analóxica.
O
CIP tamén achegará faladoiros sobre Humor, precariedade
xeracional e ilustración coa viñetista, cómica e creativa
Anastasia Bengoechea (Barcelona, 1982), Monstruo Espagueti; coa
ilustradora e humorista Violeta Navas Ortega (Granada, 1994), La
Prados; e coa viñetista Roberta Vázquez (Santiago de
Compostela,1989), autora do cómico ¡Socorro! coa editorial
Apa Apa.