O Interplay converte Carballo no escenario dunha serie post-apocalíptica
xoves, 2 de setembro do 2021
Se
ben o Festival de Contidos
Dixitais Carballo Inteplay desenvolverá o groso do seu programa
entre os días 8 e 11 deste mes, datas oficias do certame, este xa
comezou a facer ruído ao longo do verán e mesmo antes da tempada
estival. Estes días, sen ir máis lonxe, o CIP converteu a praia de
Baldaio e as rúas de Carballo nun fervedoiro creativo. O motivo? A
gravación dunha serie post-apocalíptica dentro do Obradoiro
Kamikaze que dá o pistoletazo de saída ao Carballo Interplay 2021.
As
imaxes da vila poderán verse o próximo mércores, día 8, na estrea
mundial dos dous Dinosaurios ideados e editados por unha ducia
de estudantes e de profesionais do sector audiovisual galego coa que
arrincará a 8ª edición do Festival de Contidos Dixitais. Como
todas as actividades do Interplay, este acontecemento será
presencial e de balde, previa reserva de entradas na
web do festival. A maioría das actividades poderán verse,
tamén, en Youtube, Facebook e Twitch, vía streaming.
Cousas
que nos agardan
O
Interplay trae este setembro a Carballo, por oitavo ano consecutivo,
as últimas tendencias na creatividade social de Galicia, de España
e do resto do mundo. Na Sección Oficial compiten series de
Arxentina, Chile, Ecuador, Canadá, Estados Unidos, Australia,
Alemania e Israel, ademais de Galicia e do resto de España. En
palabras da organización (o Concello de Carballo e Interplay
Producións) será “unha completa panorámica do que se está
cocendo no mundo das series a nivel global, coa comedia como fórmula
preferida polas creadoras e os creadores dixitais para contar as
historias máis diversas e dando conta da enorme relevancia que
adquiriron as temáticas sociais nas producións audiovisuais máis
anovadoras e persoais.”
O
Interplay tamén fará un balance do acadado na nosa terra en materia
de webseries, da man de creadoras de e creadores como Sonia
Méndez (Angélica y Roberta), Irene Pin (Amnesia 3.0),
Javi Camino (El viudo quiere mimos), Óscar Cruz (colectivo
Porco Bravú) ou Lucía Estévez (Xan). Nesta liña de
reivindicación do noso e co gallo de “impulsar a creación dixital
innovadora, en lingua galega e para o mundo”, achegarase unha nova
convocatoria do premio ao proxecto de serie en lingua galega, que
ofrece 3.000 euros para a creación dos tres primeiros capítulos.
O
xoves 9 pola tarde competirán por ese galardón catro comedias: Pulp
Air, unha comedia pop de Helfunk Studio (Anita Pico e Rocío
López); Pringadas, un drama come of age de Belén
Puime Bao; Trela, Clínica de suicidios, unha comedia
dramática de Gemma Do Carmo e Margot Alvarado dirixida por Cris
Andina; e Non son a túa avoa, unha historia de desencanto,
roubos e desaparacións creada por Pedro Souto. De seguido, o gañador
do premio a pasada edición do festival, David Fidalgo, estreará os
tres primeiros capítulos de Cacola, unha webserie de
animacións irreais e historias autoconclusivas cun ton de comedia
absurda na que todo pode pasar.
Masters
da Internet
Un
dos obxectivos do Carballo Interplay é seguir transformando,
medrando, ensinando, e promocionando o talento galego na rede. Por
isto, nesta edición, o equipo do festival artellou un encontro cos
principais puntas de lanza nas novas narrativas dixitais do país
moderado por Alba Mancebo e Esther Estévez, dúas das caras máis
novas e máis representativas da presenza da TVG na rede. Entre os
Masters da Internet que analizarán en que
momento se atopa a creación dixital en Galicia e que retos afrontará
no futuro atópanse os ilustres gañadores do premio Galitwitter, Jon
Amil e Mira1cousinha; representantes de dous dos podcasts máis
exitosos do último ano, Samuel L. París (MBA mal) e Carme D. Prol
(Café Derby 21), da man do creador de Podgalego, Isaac González;
creadoras de contido para Youtube, Olaxonmario e Nee Barros, e Tik
Tok, Malva e Leti da Taberna; ou un dos impulsores da iniciativa
Twitch en Galego, Agos Reigosa.