O IV Workshop Hackeando o patriarcado desvela os novos aparatos ideolóxicos do machismo na Rede
xoves, 3 de novembro do 2022
Esta
semana celébrase
na UVigo a cuarta edición do Workshop Sociedade Dixital e Xénero.
Hackeando o patriarcado,
impulsado dende a Cátedra de Feminismos 4.0 (UVigo e Deputación de
Pontevedra) co obxectivo de liberar a sociedade tecnolóxico-dixital
de machismos, agresións, discriminacións e desigualdades. A
presidenta Carmela Silva e o reitor Manuel Reigosa, xunto á
directora da área de Igualdade da UVigo, Águeda Gómez, deron este
mércores 2 de novembro o tiro de saída a este encontro virtual e
presencial que conta entre as súas conferenciantes con Remedios
Zafra, Mónica Alario, Elisa García, Elena Alfageme, MªTeresa
Piñeiro e Alba Alonso.
A
xornada remata este xoves 3 de novembro, con Reescribe o código.
Obradoiro de educación en ciberactivismo feminismo que, con
todas as prazas esgotadas, celebrarase entre as 17.00 e as 19.30 na
Facultade de Comercio de Vigo.
A
presidenta provincial Carmela Silva advertiu que “precisamos
impulsar accións como estas, que aporten coñecemento sobre o que
está a acontecer para poder construír propostas e tomar decisións,
moi particularmente nesta era dixital onde as mulleres loitamos por
apoderarnos e o machismo por buscar espazos para seguir atacando e
discriminando, para seguir facendo que as mulleres non poidamos
ocupar o espazo que nos corresponde”.
Referiuse
a presidenta ás violencias dixitais que se exercen recordando ás
xornalistas feministas, que son “atacadas duramente, dunha forma
organizada e mediante múltiples instrumentos dixitais”, ás
mulleres do ámbito do coñecemento e ás políticas feministas,
“perseguidas nas redes”. Citou como exemplo de comunidades de
homes organizadas para executar este tipo de accións como
Forocoches, que “está a atacar ás mulleres e crear pensamento
machista, intentando chegar de forma moi particular á mocidade”.
Ao respecto, amosou sentirse “seriamente preocupada pola influencia
das redes” e instou a “que as administracións públicas con
capacidade para decidir como a Unión Europea, os gobernos dos
Estados e as Comunidades Autónomas establezan normas, instrumentos e
medios para facer fronte ao que está a suceder nas redes sociais”.
Pola
súa banda, o reitor da Universidade de Vigo, Manuel Reigosa,
remarcou que “o discurso xeral pouco a pouco vaise tinguindo de
morado, pero hai moitos recunchos a onde non chega, hai espazos onde
aínda se escoitan mensaxes denigrantes contra as mulleres”.
Engadiu que “o machismo agóchase pero está aí, escondido, é un
monstro con moitas cabezas que está introducido nas redes, nos
discursos do odio e hai que seguir pelexando, cada día, para
conseguir construír esa desexada sociedade xusta, a sociedade
feminista”.
Co
lema Novos aparatos ideolóxicos. O patriarcado de vixilancia
o cuarto workshop reflexiona estes días sobre as novas
estratexias ideolóxicas do patriarcado para perpetuarse a través da
misoxinia dixital organizada: a chamada manosfera, machoesfera
ou manhood, que está a actuar como un novo “aparato
ideolóxico”.
Durante
a primeira xeira Remedios Zafra, premio Anagrama de Ensaio e premio
Internacional de Ensaio Jovellanos, impartiu unha conferencia sobre
Patriarcado e capitalismo dixital e Mónica Alario, autora de
Política sexual da pronografía. Sexo, desigualdade, violencia
e doutora internacional en Estudos Interdisciplinares de Xénero,
outra sobre Pornografía online: unha nova educación. Tralas
dúas conferencias tivo lugar unha mesa redonda, moderada pola
directora da área de Igualdade da UVigo, Águeda Gómez, na que a
profesora de Socioloxía Elisa García afondou na Manosfera
española e a onda antifeminista: da irreverencia á relevancia
política e a historiadora e antropóloga feminista, responsábel
de xénero de InteRed, Elena Alfageme, centrouse na construción do
pensamento crítico para abordar as estratexias fronte aos discursos
negacionistas machistas no mundo dixital. Pola súa banda a doutora
en Comunicación e profesora da Universidade da Coruña Mª Teresa
Piñeiro puxo o foco nas violencias dixitais contra as mulleres
xornalistas e a doutora en Filoloxía Inglesa e formadora Alba Alonso
afondou no machismo en todas as plataformas.
Actividade
deste xoves
A
xornada rematará como dixemos este 3 de novembro, e faino co
obradoiro Reescribe o código Obradoiro de educación en
ciberactivismo feminista entre as 17.00 e as 19.30 horas na
Facultade de Comercio da Universidade de Vigo a cargo de 7H
Cooperativa Cultural. O obradoiro contará con dúas partes,
arrancando cunha primeira teórica que afondará nas orixes e
evolución do ciberfeminismo, atendendo ao emprego da arte e da
contrapublicidade como estratexias discursivas. Na segunda parte
poranse en práctica as diversas posibilidades que ofrecen
ferramentas de comunicación visuais, como a ilustración, o vídeo
ou contidos dixitais como os adhesivos, os GIF e os memes,
para crear recursos creativos propios e subverter a violencia
simbólica que o patriarcado produce e reproduce a través da esfera
dixital.