O ITG cítanos este xoves cos novos xeitos colaborativos e abertos de construír
mércores, 8 de maio do 2019
Este
xoves 9 de maio o Instituto Tecnolóxico de Galicia (ITG) acolle unha
xornada sobre construción e novas tecnoloxías: unha cita para poñer
o foco no relevante punto onde se tocan (e se enriquecen)
arquitectura e innovación. O Encontro
GaliciaBIM 2019 dará comezo ás 10.00 horas e estenderase até
as 20.00, na sede que o ITG ten no número 9 do Cantón Grande na
Coruña. Os encargados de inaugurar as actividades serán o director
do Instituto Galego de Vivenda e Solo, Heriberto García, e máis o
director da Área de Construción Sostible do ITG, Óscar Martínez.
No
transcurso da xuntanza reuniranse empresas referenciais dos sectores
representados na mesma, poñendo o foco nas súas experiencias coa
metodoloxía BIM (Building Information Modeling).
Mostrarase
a visión de arquitectos, promotores e responsábeis de
administracións, e tamén aspectos clave da dita metodoloxía de
traballo colaborativa para a creación e xestión de proxectos.
Pola
mañá, empresas e expertos avaliarán a transformación das empresas
do sector da construción e exporán casos de estudo. Pola tarde,
impartirase un obradoiro teórico-práctico con prazas limitadas
sobre o control dixital da xestión dun proxecto (medición,
orzamento, planificación, certificación) e a estruturación de
datos dos modelos con estándar eCOB.
Que
é BIM?
Building
Information Modeling (BIM) é unha metodoloxía de traballo
colaborativa para a creación e xestión de iniciativas de novos
edificios. A súa finalidade é centralizar toda a información dun
proxecto nun modelo único de información dixital creado por todos
os seus axentes. BIM implica un desenvolvemento dos sistemas de
deseño tradicionais baseados no plano, xa que incorpora información
xeométrica, de tempos, de custos, ambiental e de mantemento. Froito
do seu espírito de traballo en mancomún xurdiu o procedemento
openBIM, baseado no uso de estándares abertos para favorecer o
intercambio de datos e recursos entre axentes, procesos e
aplicacións.