O IGAPE organizará a edición galega dos Premios EmprendedorXXI
venres, 1 de abril do 2016
La Caixa (Caixa Capital
Risc) e o Ministerio de Industria (a través de ENISA) veñen de
convocar a décima edición dos Premios
EmprendedorXXI, un certame dirixido a “identificar e recoñecer
as firmas con maior potencial de medre en España”. O concurso, que
abrangue empresas estatais innovadoras con menos de 3 anos de andaina
ás súas costas, terá unha vez máis edición galega. Esta vertente
contará co Instituto Galego de Promoción Económica (IGAPE) en
labores de organización. Outorgaranse cinco premios sectoriais de
ámbito estatal e 17 premios autonómicos. Os galardóns sectoriais
distinguirán as mellores empresas nos eidos das Ciencias da Vida,
as Tecnoloxías da Información, os Negocios Dixitais,
o ámbito Agroalimentario e as Tecnoloxías Industriais.
Ademais, concederanse dous accésits: un á mellor innovación
tecnolóxica e outro ao proxecto con meirande pegada social na súa
contorna.
Os emprendedores que
queiran presentar as súas iniciativas teñen de prazo desde o 30 de
marzo até o 30 de maio para enviar a súa candidatura á páxina web
emprendedorxxi.es.
Durante os meses de xuño, xullo e agosto valoraranse as candidaturas
e procederase á escolma dos finalistas. Despois, en setembro e
outubro celebraranse os actos de entrega dos premios autonómicos,
incluído o premio galego.. Pola súa banda, o fallo final dos
Premios EmprendedorXXI, na súa fase estatal, celebrarase en novembro
en Barcelona.
As empresas gañadoras a
nivel autonómico recibirán 5.000 euros, así como unha bolsa para
participar nun curso intensivo de crecemento empresarial, Ignite Fast
Track, impartido na Universidade de Cambridge (Reino Unido).
A nivel sectorial, os
gañadores de cada ámbito obterán unha achega económica de 25.000
euros e o acceso de balde durante seis meses ás Peer-to-Peer
Advisory Board, reunións mensuais dirixidas por un adestrador
especializado en innovación e emprendemento co obxectivo de
acompañar aos directores executivos de cada firma na definición de
cadansúa folla de ruta. Ademais, terán acceso a un programa de
acompañamento valorado en 25.000 euros, con actividades adaptadas ás
necesidades e acceso preferente ao financiamento de Caixa Capital
Risc e ENISA.
Edición galega 2015
Como lembraremos na
edición de 2015 en Galicia participaron 22 empresas. Resultou
gañadora a empresa Situm, que se adica á venda dunha tecnoloxía
multisensorial de localización de smartphones en interiores,
que permite coñecer a posición do dispositivo nun edificio e
ofrecer unha gran diversidade de servizos xeoposicionados. A compañía
obtivo un premio en metálico de 5.000 euros e a participación no
curso de aceleración do negocio na Universidade de Cambridge, o
devandito Ignite Fast Track.