O IGAPE destina 1,91 millóns a impulsar a transformación dos clústeres e das súas empresas

A Consellería de Economía, a través do IGAPE, concederá axudas por valor de 1,91 millóns de euros para o impulsar os clústeres galegos con vistas ao fortalecemento da competividade das pequenas e medianas e empresas. En total, 11 agrupacións empresariais e alianzas innovadoras dos respectivos sectores económicos porán en marcha até outubro de 2021 plans de formación e accións dirixidas ao fomento da dixitalización e a internacionalización do tecido produtivo da nosa Comunidade, que se prevé que mobilicen 5 millóns de euros.
Estes son os sectores representados: motor, naval, madeira, industria da alimentación e conserveira, audiovisual e edición e comunicación, TIC (Tecnoloxías da Información e a Comunicación), granito e téxtil. As entidades que desenvolverán os proxectos ao abeiro da última convocatoria son o Clúster de Empresas de Automoción (CEAGA), o do Naval ACLUNAGA, o da Madeira e do Deseño, o Alimentario Clusaga, o do Audiovisual, a Asociación Nacional de Fabricantes de Conservas de Pescados (ANFACO-CECOPESCA), o Clúster TIC, o da Acuicultura CETGA, o de Comunicación, o do Granito e o Téxtil Moda COINTEGA.
As axudas, en palabras do IGAPE, “contribuirán a consolidar os clústeres galegos para que sigan mobilizando recursos e proxectos e reforcen o seu papel activo á hora de definir estratexias cooperativas nos diversos ámbitos de desenvolvemento tecnolóxico, ademais de continuar co seu papel fundamental de aceleradores da Axenda Industria 4.0 e impulsoras do novo modelo industrial”.
En definitiva, as axudas apoiarán o papel destas organizacións como “pezas estratéxicas” no impulso de proxectos innovadores, dando soporte á transformación dixital das firmas de cadanseus eidos influencia (poñendo o foco nas PEME), amais de reforzar o papel dinamizador dos clústeres na actividade económica de Galicia, xa que os sectores produtivos representados por estas entidades acada algo máis do 75% do PIB de Galicia.
As axudas acabadas de publicar dan continuidade ás convocatorias realizadas no período 2013-2018, ás que se destinaron 5,4 millóns de euros.