O Goberno financia tres novos proxectos de intelixencia artificial nos que participa o CITIC
venres, 28 de outubro do 2022
Até
tres proxectos nos que participa o
Centro de Investigación TIC (CITIC) da Universidade da Coruña foron
seleccionados pola entidade público-empresarial Red.es (Ministerio
de Asuntos Económicos e Transformación Dixital) ao abeiro da
súa convocatoria para o desenvolvemento da intelixencia artificial e
a súa integración nas cadeas de valor. En total, estes tres
proxectos beneficiaranse dun financiamento de preto de 1,4 millóns
de euros. Trátase de tres iniciativas de investigación centradas
nos algoritmos para detectar bacterias en hospitais, na prevención
de doenzas profesionais e nos recursos intelixentes de minería de
textos para efectuar melloras en vixilancia tecnolóxica. O seu
denominador común é, en palabras do CITIC, “a aplicación da IA á
optimización de procesos en diferentes ámbitos de impacto económico
e social”.
As
empresas Bahía Software, Ibersys Seguridad y Salud e Linknovate
Science decidiron contar co CITIC como socio tecnolóxico para
participar no desenvolvemento dos proxectos. Do total dos fondos
recibidos polas compañías a través desta convocatoria,
repercutirán no centro de investigación preto de 300.000 euros.
O
proxecto GRALENIA, aborda o problema da resistencia a
antimicrobianos (AMR) no ámbito hospitalario. O proxecto está
impulsado pola compañía Bahía Software en colaboración co
Instituto de Investigación Biomédica da Coruña (INIBIC), a
Universidade de Murcia e os investigadores principais do CITIC Jesús
Vilares Ferro e Carlos Gómez Rodríguez, e co-financiado polo
Ministerio de Asuntos Económicos e Transformación Dixital de
España, a Secretaría de Estado de Dixitalización e Intelixencia
artificial de España, Red.es e polos Fondos Next Generation EU. O
obxectivo do proxecto é desenvolver unha plataforma de apoio a
decisións clínicas no ámbito da xestión do AMR e as
superbacterias. Este sistema empregará técnicas avanzadas de Ial
para analizar a información obtida dos bancos de datos dos diversos
servizos do hospital. No caso do CITIC, a achega consistirá na
análise automática do contido de historias clínicas e outros
documentos en formato texto, empregando para iso técnicas de
Procesado da Linguaxe Natural. Este proxecto pretende “mellorar os
procesos de xestión hospitalaria relacionados co AMR, axudando a
deseñar mellores estratexias para a prevención e redución dos seus
efectos, ademais do custo en vidas e económico que iso supón”.
O
proxecto SMART PRE2, centrado en IA aplicada á predición e
prevención de doenzas profesionais, corresponde á compañía
Ibsersys Seguridade e Saúde e conta coa colaboración dun equipo de
investigadores/as do CITIC liderado por José Luis Calvo Rolle e
Óscar Fontenla Romero. O seu obxectivo xeral é a detección de
posíbeis alteracións de saúde entre os persoais das empresas
mediante o tratamento dos datos dispoñíbeis no historial de
recoñecementos médicos e outra información da contorna no que se
desenvolve o traballo. Desde o CITIC implementaranse modelos de
aprendizaxe automática para a análise dos datos médicos
proporcionados pola empresa, e sistemas baseados en coñecemento para
dotar de capacidade diagnóstica e explicativa ao sistema. Este tipo
de técnicas “proporcionarán un valor engadido para unha xestión
máis eficiente e a detección de posíbeis anomalías para os
distintos postos profesionais de diferentes empresas”, explicaron
fontes do CITIC.
Por
último, a compañía Linknovate Science, xunto co IP do centro
Javier Parapar López, desenvolverán o proxecto Métodos
intelixentes de minería de textos para melloras substanciais de
procura en Vixilancia Tecnolóxica. Esta proposta ten a súa
orixe no “especial coñecemento no procesado e minería de textos,
sistemas de recuperación e información e definición de modelos de
clasificación usando representacións densas de documentos”,
explicou o CITIC, engadindo que “os investigadores participarán
nas tarefas asociadas á clasificación automática de patentes e á
extracción e o estruturado intelixente de información”. O equipo
do CITIC non só traballará no relativo á definición de modelos
formais para as tarefas, senón tamén no deseño das metodoloxías
de avaliación e validación das solucións.