O Goberno destinará 46 millóns de euros a afondar no afianzamento do DNIe

O Goberno destinará 46 millóns de euros á implantación do DNI electrónico nun novo proxecto de desenvolvemento e de divulgación da nova tarxeta identificativa. Así o fixo saber este venres 20 o Ministerio de Industria, quen traballará de xeito conxunto co do Interior nesta nova iniciativa, aprobada xa polo Consello de Ministros. O obxectivo do acordo é cooperar tecnolóxica e economicamente na realización de actuacións de afianzamento e difusión das vantaxes do DNIe para a sociedade, documento que segundo recentes enquisas aínda presenta máis sombras de coñecemento ca verdadeiras luces para o groso da cidadanía. Estas son segundo Industria as principais liñas estratéxicas:
· Potenciación e adaptación da infraestrutura do Centro de Proceso de Datos, incluíndo a creación dun centro de proceso de datos alternativo, para seguridade e continuidade na expedición e atención ós cidadáns.
· Adaptación dos locais das Oficinas de Expedición.
· Adquisición do equipamento informático preciso para o despregue do DNI electrónico segundo o programa previsto.
· Outras actuacións dirixidas a facilitar a súa implantación: comunicación, divulgación e promoción do DNIe, así como a asistencia técnica ó cidadán.