O Foro Tecnolóxico do Emprego deixa manifesta, unha vez máis, a demanda de enxeñeiros
xoves, 22 de marzo do 2012
Comezou este mércores no Campus de Vigo o Foro Tecnolóxico de Emprego
coa presenza de 14 stands e preto de
vinte empresas participantes, todas elas, en maior ou menor medida, directamente relacionadas coas TIC. Segundo informa na súa web a Universidade,
impulsora do evento (organizado polas delegacións de alumnos das tres escolas
de enxeñarías do campus), este busca achegar o mundo empresarial aos futuros
enxeñeiros “e deixar patente que, pese
aos tempos que corren, o mercado laboral segue demandando enxeñeiros”. A
inauguración contou coa presenza do reitor, Salustiano Mato, e do coordinador
do Foro, Pablo Sánchez. Ámbolos dous salientaron a cita como “o lugar ideal no que acadar as claves para
poder mergullarse no mercado laboral”.
Durante a inauguración, na que estiveron
acompañados polo concelleiro de Emprego, Santos Héctor, e os directores das
escolas de enxeñaría de Telecomunicación e Industrial, Mato fixo fincapé en que
se trata dunha iniciativa “dos alumnos
para os alumnos” e, nesta liña, salientou que compre, “sobre todo nun intre tan difícil como o actual”, valorar o esforzo
do alumnado na organización do foro. “É a
mellor maneira de dicirlle a cidadanía que na Universidade non nos vai a vencer
nunca o desalento, por moita crise que exista”, engadiu.
Alcoa, R, Altran, Fundación Barrie, Ega
Consultores, Fundación Faimevi, Feuga, Repsol, Tecnocom... son firmas que dende
hoxe e ata o venres van atender no vestíbulo da ETS de Enxeñaría de Minas as
dúbidas dos futuros enxeñeiros. Ata entón, ademais dos stands, haberá diferentes actividades que inclúen dende workshops, organizados por diferentes
empresas ata varias mesas redondas, incluída unha sobre vehículos eléctricos, “un tema de gran potencial”, segundo
destacou o coordinador do foro.